“Anora” filmidagi roli bilan tomoshabinlarga yaxshi tanish bo‘lgan aktrisa Fotima Vohidova “Daryo”ning YouTube’dagi kanaliga bergan intervyusida kino olamiga qanday kirib kelgani va tashqi ko‘rinishi sabab ko‘p rollarga tasdiqlanmagani haqida gapirdi.
— Bolaligimdan Yulduz Usmonovaga havas qilib kelaman, O‘zbekiston davlat konservatoriyasida o‘qiyman, derdim. Maktab tadbirlarining birida mashhur san’atkorlar davrasida qo‘shiq kuylab qoldim. Ular orasida Murod Rajabov ham bor edi. Tabiatan juda sho‘x qiz edim, ustozlarga ham Konservatoriyaga kirishni xohlashimni aytdim. Shunda Murod Rajabov musiqadan, notalardan xabarim bor yo‘qligi haqida so‘rab, aktyorlik sohasidan ketishimni maslahat berdi. Ustozning maslahati bilan 11-sinfni tugatib, dadam bilan Toshkentga keldik.
O‘zbekiston san’at va madaniyat universitetiga o‘qishga kirdim. O‘zbekiston xalq artisti Turg‘un Azizovning aktyorlik kursiga qabul qilindim. Avvaliga “Qirq tog‘oraning qirq nog‘orasi” kabi seriallarda kichik epizod rollarni o‘ynab yurdim. Bir kuni Murod Rajabov institut yo‘lagida ko‘rib, film suratga olayotgani haqida aytib, kastingga borishimni aytdi. Ishonsangiz, borgim kelmadi, sababi chiroyli aktrisalar ko‘p edi, baribir qabul qilishmaydi, deb o‘yladim. Lekin ustozni raylarini qaytarmay kastingga borib, qo‘shiq kuylab berdim. Kastingda chiroyli aktrisalar ishtirok etgandi, rolga tasdiqlanishimga ishonmadim. Ammo bir haftadan keyin rolga tasdiqlanganimni aytishdi. “Meni tasdiqlashmagan, shunchaki hazillashishdi”, deb bir haftagacha ishonqiramay yurdim. Murod Rajabov Anoraning kiyimlarini berib, uyimdan suratga olish maydonchasigacha shu libosda kelishimni ta’yinladi. Avvaliga uyaldim, bir-ikki marta o‘z kiyimimda kelib keyin yashirinib eski kiyimlarni kiyib olganimni bilib, juda qattiq urishib berdi. Keyin shu holatda uydan chiqib ketaverdim. Yo‘lda odamlar rahmi kelib qarashardi va shunda Anorani his qilardim. Mana endi ustoz to‘g‘ri qilganlarini tushunib kelyapman. Bitta filmda rol ijro etgan bo‘lsam ham Obid Yunusov, Klara Jalilova, Rixsi Ibrohimova, Murod Rajabov kabi ko‘plab ustoz san‘atkorlar bilan ishlash baxti nasib etdi, — deydi Fotima Vohidova.
Aktrisa suratga olish jarayonida jurnalistlarning gapidan ranjigani va ikki kunga “yo‘qolib” qolganini esladi.
— Suratga olish jarayonida kadrda chiroyli ko‘rinay deb ozgina pardoz qilib olardim, ustozga bu yoqmay yuzimni yuvdirardi. Bir kuni syomka jarayonida jurnalistlar kelib, “ Bosh rol ijrochisini ko‘rmoqchimiz”, deyishgan. “Murod aka “Mana shu qiz Anora” deganida jurnalistlar hayron bo‘lib qarashgandi. Hatto hayron bo‘lib “Boshqa aktrisa yo‘qmidi?” deyishgan. Chunki men pardozsiz, eski kiyimlarda, boshimda qalpoq bilan qo‘rqibgina o‘tirgan edim-da. Shu gapdan keyin tasvirga olish maydonchasidan qochib ketganman, naqd ikki kun topisholmagandi. Mayli men roziman, boshqa chiroyli qiz topinglar deb turganimda, yo‘q, “Anora” chiroyli qiz haqida emas, u qalbi go‘zal yetim qiz haqida, biz sening qalbingni ko‘rsatib berishimiz kerak, deb yupatgandi.
Ustoz meni “Temir xotin”ni o‘ynagan Dilorom Qambarovaga o‘xshatardi. “Mana u ham chiroyli emas, lekin odamlar uning yuragini ko‘zi orqali ko‘rib his qilishgan. Aktrisa chiroyli bo‘lishi shart emas, uning yuragi ishlashi kerak” deb o‘rgatardi. Undan keyin ham juda ko‘p filmlar kastingiga bordim, lekin xunuksan deb qabul qilishmadi. Professional aktrisalar qolib, bu sohadan xabari yo‘qlar yuqoriga o‘tib ketishi meni juda xafa qilgan. Men bilgan juda ko‘p mahoratli aktyor aktrisalar teatrda qolib ketishdi. Bilmadim, kinoda bu masala hozir qanday. Mendan nega kinolarda ko‘rinmaysiz, deb ko‘p so‘rashardi, nima deb javob qaytarishni bilmay qolardim. Shu bilan teatrda va boshqa sohalarda o‘zimni sinab ko‘ra boshladim, — deydi Fotima Vohidova.
Suhbatni to‘liq holda tomosha qilishingiz mumkin.
Izoh (0)