Livandagi “Hizbulloh” guruhi 11-avgust kuni Isroil shimoliga o‘nlab o‘rta masofali raketalar uchirgan. Bu haqda CNN nashri Yaqin Sharq manbalariga tayanib, xabar berdi.
Manbada aytilishicha, raketalar Livan janubidan, chegara oldi hududlarida uchirilgan. Tungi hujumda raketalar tartibsiz ravishda turli nishonlarga uchirilgan.
“Hizbulloh” rasmiylari bayonotiga ko‘ra, so‘nggi hujumlar G‘azodagi Falastin xalqini qo‘llab-quvvatlash va Isroilning Livan janubidagi zarbalariga javob tariqasida otilgan. Oldinroq Livan janubidagi Marub shahriga Isroil hujum uyushtirishi oqibatida 12 kishi, jumladan, 6 nafar bola halok bo‘lgan edi.
Isroil mudofaa kuchlari Livandan 30 ga yaqin raketa uchirilganini tasdiqlagan. Ularning ayrimlari ochiq maydonlarga qulagan, binolarga shikast yetishi va fuqarolarga zarar yetishi holatlari kuzatilmagan.
Tel-Aviv harbiy rahbariyati chegara hududlarida harbiy shaylik holati kuchaytirilganini xabar bergan. Havo va quruqlikdan uyushtirilgan har qanday zarbaga nisbatan munosib javob berilishi aytilgan.
Mudofaa kuchlari va xavfsizlik tuzilmasi Eron va “Hizbulloh”ga eʼtibor qaratgan holda dushmanlarimizni va Yaqin Sharqdagi voqealarni kuzatib boradi va vaziyatni doimiy ravishda baholaydi. Qurolli kuchlar yuqori shaylikda joylashtirilgan va tayyorgarlikdan o‘tmoqda. Agar ko‘rsatmalarni o‘zgartirish zarurati tug‘ilsa, biz bu haqda rasmiy kanallarda tartibli tarzda xabarda qilamiz, deyiladi Isroil mudofaa kuchlari matbuot bo‘limi xabarida.
Isroil rahbariyati mamlakat shimoliga “Hizbulloh” hujumi takrorlanishi mumkinligini aytgan. Ushbu xavf sabab ayrim aholi punktlarini favqulodda vaziyatlarda ko‘chirish mumkinligi haqida ogohlantirilgan.
Izoh (0)