Uganda poytaxti Kampalada 11-avgust kuni chiqindi poligonidan ko‘chki yuz berishi oqibatida kamida 21 kishi halok bo‘lgan. Bu haqda Reuters nashri xabar berdi.
Manbada aytilishicha, so‘nggi haftada yuz bergan kuchli yomg‘irdan so‘ng Kampala shahri tashqarisidagi chiqindi uyumida ko‘chki yuz bergan. Katta hajmli chiqindi uyumlari yaqin atrofdagi aholi uylarini ko‘mib tashlagan.
Ko‘chki yuz bergan paytda aholi vakillari xonadonlarida uxlayotgan bo‘lgan. Shu boisdan ham tezkor harakat qilish hamda fuqarolarni qutqarib qolishning imkoni bo‘lmagan.
Mamlakat prezident Yoveri Museveni axlatxona yaqinida yashovchi barcha fuqarolarni tezkor ravishda ko‘chirishni buyurgan. Halok bo‘lganlarni tezkor surʼatda qidirishni davom ettirish topshirilgan.
Hukumat, shuningdek, ko‘chki sabablarini tekshirishni boshlagan. Chiqindi poligonining mustahkamligiga masʼul bo‘lgan shaxslar tergov qilinishi va tegishlicha javobgarlikka tortilishi aytilgan.
Politsiya matbuot kotibi Patrik Onyangoning aytishicha, hozirgacha kamida 14 kishi chiqindi uyumi ostidan qutqarib olingan. Mahalliy aholi yana o‘nlab fuqarolar uyum ostida qolib ketganini aytgan.
Kitezi nomi bilan tanilgan poligon o‘nlab yillar davomida Kampalaning yagona chiqindi yig‘ish hududi bo‘lib xizmat qilgan. Chiqindi uzoq muddat davomida bitta joyda to‘planishi oqibatida baland tepalik hosil bo‘lgan. Ushbu uyum o‘zidan chiqaradigan badbo‘y hid va kasalliklar tufayli muntazam ravishda aholi eʼtiroziga sabab bo‘lib kelgan.
Izoh (0)