Gretsiyada 11-avgust kuni yuzaga kelgan keng miqyosli o‘rmon yong‘inlari sabab minglab fuqarolar favqulodda evakuatsiya qilingan. Bu haqda Reuters nashri xabar berdi.
Manbada aytilishicha, mamlakatdagi ekstremal ob-havo sharoiti tufayli janubdagi o‘rmonlarda yong‘in yuzaga kelgan. O‘rta Yer dengizi hududidan issiq havo massalari kelishi esa yong‘inlarni kuchaytirgan.
Yong‘inlar taʼsiri mamlakat poytaxti Afinada ham sezilgan. Shaharning qator kvartallari tutun ichida qolgan. Tezkor qutqaruv brigadalari aholini ko‘chirish uchun jalb qilingan.
Gretsiya bosh vaziri Kiriakos Mitsotakis favqulodda vaziyat sababli davlat taʼtilidan qaytgan. Bosh vazir buyrug‘i bilan sharqiy viloyatlarda ommaviy safarbarlik boshlangan. Ko‘plab harbiy texnikalar: samolyot va vertolyotlar yong‘inlarni o‘chirish uchun jalb qilingan.
So‘nggi 24 soat ichida Gretsiyaning 40 ta hududida o‘rmon yong‘inlari qayd etilgan. Ulardan 33 tasi bartaraf etilgan. 7 ta yirik yong‘in esa hanuz davom etayotgani bildirilgan.
Mamlakat fuqaro muhofazasi vaziri Vassilis Kikilias mamlakatning qariyb yarmida yuqori harorat, shamol va qurg‘oqchilik tufayli yong‘in xavfi yuqori ekanligi haqida ogohlantirgan. Afina yaqinidagi Sharqiy Attika mintaqasida, Varnavas hududidagi yong‘in tarqoq qarag‘ay o‘rmonlari hududiga tarqalib, katta hajmdagi qizil tutun tarqalishiga olib kelgan.
O‘t o‘chirish ishlariga yordamlashish uchun 400 dan ortiq o‘t o‘chiruvchi, 110 ta mashina, 29 ta samolyot va vertolyotlar olib kelingan. Alanga balandligi ko‘plab hududda 25 metrdan balandga ko‘tarilgan.
Izoh (0)