Bangladeshda so‘nggi 23 kun ichida sodir bo‘lgan namoyishchilar va politsiya o‘rtasidagi to‘qnashuvlar 560 kishining o‘limiga sabab bo‘ldi, deb xabar berdi Dhaka Tribune jurnalistlarning hisob-kitoblariga tayanib. Xususan, ushbu ma’lumotlarga ko‘ra, joriy haftaning dushanbasidan chorshanbasigacha 232 kishi halok bo‘lgan.
5-avgust, dushanba kuni Bangladeshda norozilik namoyishlari kuchaydi. O‘sha kuni kechqurun armiya bosh vazir Shayx Hasina mamlakatni tark etgani haqida xabar berdi. Seshanba kuni Bangladesh prezidenti Muhammad Shahobiddin muvaqqat hukumat tuzilishi arafasida parlamentni tarqatib yubordi.
Payshanba kuni Tinchlik uchun Nobel mukofoti sovrindori Muhammad Yunus boshchiligidagi muvaqqat hukumat qasamyod qildi.
Bangladeshdagi norozilik namoyishlari iyul oyida universitet kampuslaridan birida boshlandi — talabalar mamlakatning 1971-yildagi mustaqillik urushi faxriylari oila a’zolari uchun ish o‘rinlarining 30 foiz kvotalari qaytarilishiga qarshi chiqdi. Bu amaliyot 2018-yilda bekor qilingan, biroq joriy yilning iyun oyida sud qarori bilan qaytadan joriy qilingandi. Talabalar buni kamsitish deb hisobladi, ayniqsa mamlakatdagi ishsizlik darajasi yuqori bo‘lgan hozirgi holatda.
7-avgust, chorshanba kuni Muhammad Yunus muvaqqat hukumatning bo‘lajak rahbari deb e’lon qilingan kunning ertasiga Bangladesh poytaxti ko‘chalarida tartibsizliklar tindi. Ilgari hukumatga qarshi namoyishlarga rahbarlik qilgan talabalar shaharda ko‘chalarni tozalash va transport harakatini tartibga solish bilan shug‘ullanmoqda.
Izoh (0)