AQSH prezidentligiga Respublikachilar partiyasidan nomzod Donald Tramp va Demokratik partiyadan Kamala Harris 10-sentyabr kuni debat o‘tkazishga kelishib oldi, deya Reuters xabar berdi.
Uchrashuv ularning saylovoldi poygasidagi ilk og‘zaki bellashuvi bo‘lishi kutilmoqda.
Ipsos so‘roviga ko‘ra, iyul oyi oxiridan beri Kamala Harris Amerikaning sobiq prezidentidan ustunligini 5 foizga oshirgan. Tadqiqotga ko‘ra, respondentlarning 42 foizi unga, 37 foizi Trampga ovoz berishga tayyor. Saylovchilarning yana 4 foizi mustaqil nomzod Robert Kennedini qo‘llab-quvvatlagan. Shu bilan birga, o‘rtacha so‘rov ma’lumotlariga ko‘ra, demokrat respublikachilardan hamon 0,5 foizga oldinda.
Donald Tramp Palm-Bichdagi (Texas shtati) qarorgohida o‘tkazilgan matbuot anjumanida 4 va 25 sentyabr kunlari tegishli ravishda Fox News va ABC News telekanallarida namoyish etiladigan qo‘shimcha debatlar o‘tkazishga tayyorligini ma’lum qilgan. Biroq, Harrisning saylovoldi tashviqoti vakili, Fox telekanalida 4-sentyabr kuni bo‘lib o‘tgan debat muhokama qilinmayotganini ma’lum qilgan. Harrisga ko‘ra, qo‘shimcha raundlar bo‘yicha muhokamalar 10-sentyabrdagi yig‘ilishdan keyin boshlanadi.
AQSHda saylovlar 5-noyabrga belgilangan. 21-iyul kuni AQSHning amaldagi prezidenti Jo Bayden o‘z nomzodini prezidentlik poygasidan olib tashlash qarorini e’lon qilgan edi. Buning evaziga u Demokratik partiyadan Kamala Harris nomzodini ilgari surishni taklif qilgan. Harris saylovoldi kampaniyasi bir haftada 200 million dollar xayriya yig‘ishga muvaffaq bo‘lgan. 7-avgust kuni u prezidentlik saylovlarida Demokratik partiyaning rasmiy nomzodi sifatida tasdiqlangan.
Izoh (0)