Бангладешда сўнгги 23 кун ичида содир бўлган намойишчилар ва полиция ўртасидаги тўқнашувлар 560 кишининг ўлимига сабаб бўлди, деб хабар берди Dhaka Tribune журналистларнинг ҳисоб-китобларига таяниб. Хусусан, ушбу маълумотларга кўра, жорий ҳафтанинг душанбасидан чоршанбасигача 232 киши ҳалок бўлган.
5 август, душанба куни Бангладешда норозилик намойишлари кучайди. Ўша куни кечқурун армия бош вазир Шайх Ҳасина мамлакатни тарк этгани ҳақида хабар берди. Сешанба куни Бангладеш президенти Муҳаммад Шаҳобиддин муваққат ҳукумат тузилиши арафасида парламентни тарқатиб юборди.
Пайшанба куни Тинчлик учун Нобель мукофоти совриндори Муҳаммад Юнус бошчилигидаги муваққат ҳукумат қасамёд қилди.
Бангладешдаги норозилик намойишлари июль ойида университет кампусларидан бирида бошланди — талабалар мамлакатнинг 1971 йилдаги мустақиллик уруши фахрийлари оила аъзолари учун иш ўринларининг 30 фоиз квоталари қайтарилишига қарши чиқди. Бу амалиёт 2018 йилда бекор қилинган, бироқ жорий йилнинг июнь ойида суд қарори билан қайтадан жорий қилинганди. Талабалар буни камситиш деб ҳисоблади, айниқса мамлакатдаги ишсизлик даражаси юқори бўлган ҳозирги ҳолатда.
7 август, чоршанба куни Муҳаммад Юнус муваққат ҳукуматнинг бўлажак раҳбари деб эълон қилинган куннинг эртасига Бангладеш пойтахти кўчаларида тартибсизликлар тинди. Илгари ҳукуматга қарши намойишларга раҳбарлик қилган талабалар шаҳарда кўчаларни тозалаш ва транспорт ҳаракатини тартибга солиш билан шуғулланмоқда.
Изоҳ (0)