Parij—2024. Boltaboyevning jangi bekor qilindi. Uning raqibida doping aniqlandi

Parij Olimpiadasida ishtirok etishi kerak bo‘lgan iroqlik dzyudochi Sajjod G‘anim Sihin doping sabab musobaqalardan chetlatildi.

28 yoshli sportchining qonida metandiyenon va boldenon taqiqlangan moddalari topilgan. U 2024-yilgi Olimpiada o‘yinlarida doping iste’mol qilgani uchun diskvalifikatsiya qilingan birinchi sportchiga aylandi.

Xalqaro doping-test agentligi (ITA) xabariga ko‘ra, sportchining qon tahlili 23-iyul kuni Fransiyaning Parij shahrida olingan. Laboratoriya tekshiruvi natijalari 25-iyul kuni ma’lum bo‘lgan. Sajjod G‘anim Sihin ITA qarori ustidan Sport arbitraj sudiga shikoyat qilish huquqiga ega.

Iroqlik sportchi 81 kg vazn toifasida ishtirok etishi, 30-iyul kuni 1/16 final bosqichi doirasida o‘zbekistonlik Sharofiddin Boltaboyev bilan jang qilishi kerak edi. O‘zbekistonlik dzyudochi to‘g‘ridan to‘g‘ri keyingi bosqichga yo‘l oldi.