Parij—2024. Kapadze shogirdlari Misrga qarshi maydonga tushadi

O‘zbekiston Olimpiya terma jamoasi bugun, 27-iyul sanasida Olimpiadaning futbol turniri doirasida Misr terma jamoasiga qarshi maydonga tushadi.

Mazkur o‘yinda o‘zbekistonlik futbolchilar to‘liq oq libosda, darvozabon esa yashil libosda maydonga tushadi.

Uchrashuvni esa okeaniyalik hakamlar brigadasi boshqarib boradi.

Bosh hakam — Kavana-Vauf Kempbell (Yangi Zelandiya), unga qanotlarda Trevis Isaak (Yangi Zelandiya) va Mutukera Bernard (Solomon orollari) yordam beradi. 4-rasmiy hakam vazifasi Hamilton Odettega (Yamayka) topshirilgan.

 O‘zbekiston — Misr o‘rtasidagi o‘yin 27-iyul soat 20:00 da “Bojuar” stadionida bo‘lib o‘tadi.

Uchrashuv oldidan Timur Kapadze o‘z fikrlarini bildirib o‘tdi.

“Misrga keladigan bo‘lsak, Afrikaning eng kuchli jamoalaridan biri. Ular bilan o‘tgan yili Toshkentda o‘ynaganmiz. Raqibimizning kuchli tomonlari va imkoniyatlarini yaxshi bilamiz. Shunga yarasha biz ham o‘z rejamizga ko‘ra tayyorgarlik ko‘ramiz va g‘alaba qozonish uchun bor imkoniyatimizni ishga solamiz.

Birinchi uchrashuvdan keyin o‘yinimizni tahlil qilib chiqdik va o‘zimizga kerakli bo‘lgan xulosalarni chiqardik. O‘yin davomida baʼzi vaziyatlarda yaxshiroq o‘ynadik, baʼzida esa kamchiliklar ham ko‘zga tashlandi. Biroq, aytganimdek, xatolar ustida ishlab boryapmiz va hozirda bor eʼtiborimiz ertangi o‘yinga qaratilgan”, deydi O‘zbekiston bosh murabbiyi.

Olimpiya jamoasi a’zosi Ibrohimhalil Yo‘ldoshev oilaviy muammolari sabab terma jamoa tarkibini tark etishga majbur bo‘ldi. Aynan uning yo‘qligi bois Kapadze taktik o‘zgarishlar amalga oshirishi mumkin. 

Timur Kapadze shogirdlari 1-turda Ispaniyaga qarshi maydonga tushib, 1:2 hisobida mag‘lub bo‘lgandi. Misr olimpiyachilari Dominikan Respublikasi bilan nursiz durangga imzo chekdi va bir ochkoga ega bo‘ldi. 

Bugungi uchrashuvda mag‘lub jamoa keyingi bosqichga chiqish imkoniyatlarini keskin pasaytirib yuboradi.