Ўзбекистон Олимпия терма жамоаси бугун, 27 июль санасида Олимпиаданинг футбол турнири доирасида Миср терма жамоасига қарши майдонга тушади.
Мазкур ўйинда ўзбекистонлик футболчилар тўлиқ оқ либосда, дарвозабон эса яшил либосда майдонга тушади.
Учрашувни эса океаниялик ҳакамлар бригадаси бошқариб боради.
Бош ҳакам — Кавана-Вауф Кемпбелл (Янги Зеландия), унга қанотларда Тревис Исаак (Янги Зеландия) ва Мутукера Бернард (Соломон ороллари) ёрдам беради. 4-расмий ҳакам вазифаси Ҳамилтон Одеттега (Ямайка) топширилган.
Ўзбекистон — Миср ўртасидаги ўйин 27 июль соат 20:00 да “Божуар” стадионида бўлиб ўтади.
![](/static/2024/07/27/gettyimages-2162671065-2048x2048-FKqYT0_U-lUD6HnWG.jpg)
Учрашув олдидан Тимур Кападзе ўз фикрларини билдириб ўтди.
“Мисрга келадиган бўлсак, Африканинг энг кучли жамоаларидан бири. Улар билан ўтган йили Тошкентда ўйнаганмиз. Рақибимизнинг кучли томонлари ва имкониятларини яхши биламиз. Шунга яраша биз ҳам ўз режамизга кўра тайёргарлик кўрамиз ва ғалаба қозониш учун бор имкониятимизни ишга соламиз.
Биринчи учрашувдан кейин ўйинимизни таҳлил қилиб чиқдик ва ўзимизга керакли бўлган хулосаларни чиқардик. Ўйин давомида баъзи вазиятларда яхшироқ ўйнадик, баъзида эса камчиликлар ҳам кўзга ташланди. Бироқ, айтганимдек, хатолар устида ишлаб боряпмиз ва ҳозирда бор эътиборимиз эртанги ўйинга қаратилган”, дейди Ўзбекистон бош мураббийи.
Олимпия жамоаси аъзоси Иброҳимҳалил Йўлдошев оилавий муаммолари сабаб терма жамоа таркибини тарк этишга мажбур бўлди. Айнан унинг йўқлиги боис Кападзе тактик ўзгаришлар амалга ошириши мумкин.
![](/static/2024/07/27/Screenshot 2024-07-27 101356-WwY5ms0b.png)
Тимур Кападзе шогирдлари 1-турда Испанияга қарши майдонга тушиб, 1:2 ҳисобида мағлуб бўлганди. Миср олимпиячилари Доминикан Республикаси билан нурсиз дурангга имзо чекди ва бир очкога эга бўлди.
Бугунги учрашувда мағлуб жамоа кейинги босқичга чиқиш имкониятларини кескин пасайтириб юборади.
Изоҳ (0)