O‘zbekiston U-23 terma jamoasi bosh murabbiyi Timur Kapadze ertangi o‘yin oldidan o‘z fikrlarini bildirib o‘tdi.
Bosh murabbiy Nant shahrida bo‘lib o‘tadigan uchrashuvga bir yo‘qotish bilan tayyorgarlik ko‘rayotganini ta’kidladi.
Kecha Nant shahriga yetib keldik, tayyorgarlikni davom ettirmoqdamiz. Oldimizda Misrga qarshi uchrashuv kutib turibdi. Eng asosiysi — hamma sog‘-salomat, biroq bitta yo‘qotishimiz bor. Himoyachimiz Ibrohimhalil oilaviy sabablarga ko‘ra terma jamoa ixtiyorini tark etishga majbur bo‘ldi. Lekin shunga qaramasdan reja bo‘yicha mashg‘ulotlarni davom ettiryapmiz va ertangi uchrashuvda g‘alaba qozonishga harakat qilamiz.
Murabbiyning fikricha galdagi raqib Afrikaning eng kuchli jamoalaridan biri.
Misrga keladigan bo‘lsak, Afrikaning eng kuchli jamoalaridan biri. Ular bilan o‘tgan yili Toshkentda o‘ynaganmiz. Raqibimizning kuchli tomonlari va imkoniyatlarini yaxshi bilamiz. Shunga yarasha biz ham o‘z rejamizga ko‘ra tayyorgarlik ko‘ramiz va g‘alaba qozonish uchun bor imkoniyatimizni ishga solamiz.
Kapadze ilk uchrashuvdan keyin jamoa o‘yinini tahlil qilgani va kamchiliklar ko‘zga tashlanganini e’tirof etdi.
Birinchi uchrashuvdan keyin o‘yinimizni tahlil qilib chiqdik va o‘zimizga kerakli bo‘lgan xulosalarni chiqardik. O‘yin davomida baʼzi vaziyatlarda yaxshiroq o‘ynadik, baʼzida esa kamchiliklar ham ko‘zga tashlandi. Biroq, aytganimdek, xatolar ustida ishlab boryapmiz va hozirda bor eʼtiborimiz ertangi o‘yinga qaratilgan.
Jamoada qolgan barcha sog‘, muammo yo‘q. Ibrohimhalil ketganidan so‘ng zaxira futbolchilarimizdan birini qaydnomaga kiritishga harakat qilyapmiz. Bu borada tashkiliy qo‘mitaga so‘rov yubordik, hozircha javobni kutmoqdamiz.
Ibrohimhalil o‘rniga zaxira tarkibidan Alisher Odilov yoki Behruzbek Asqarov taklif etilishi mumkin.
Ma’lumot uchun, 2-tur doirasidagi O‘zbekiston – Misr uchrashuvi 27 iyul kuni soat 20:00da Nant shahrida bo‘lib o‘tadi. O‘zbekiston terma jamoasi ushbu uchrashuvga oq liboslarda maydonga tushadi.
Izoh (0)