Andijon viloyatida yashovchi Q.A. ichki ishlar organlariga murojaat qilib, bank kartasidan 4 mln so‘m miqdoridagi pul mablag‘lari nomaʼlum shaxs tomonidan firibgarlik yo‘li bilan o‘zlashtirilganligini maʼlum qilgan. Bu haqda Kiberxavfsizlik markazi xabar berdi.
O‘tkazilgan tezkor-qidiruv tadbirlari natijasida mazkur jinoyatni Farg‘ona viloyatida yashovchi N.I. sodir etganligi aniqlangan.
Maʼlum bo‘lishicha, N.I. jabrlanuvchi Q.A. bilan Telegram orqali tanishib, unga haydovchilik guvohnomasini imtihonlarsiz olib berishda yordam berishni aytib, oldindan 4 mln so‘m miqdoridagi pullarni o‘zining foydalanuvida bo‘lgan bank kartasiga o‘tkazib olib, yozishmalarni o‘chirib yuborgan. Uning qo‘ng‘iroqlariga javob bermay, qora ro‘yxatga kirgizib qo‘ygan.
Mazkur holat yuzasidan N.I.ga nisbatan JKning 168-moddasi (firibgarlik) 3-qismi “g” bandi bilan jinoyat ishi qo‘zg‘atilgan.
Izoh (0)