O‘zbekistonda quriladigan atom elektr stansiyasiga mahalliy quruvchilar, qurilish, mashinasozlik korxonalari jalb etiladi. Bu haqda “Daryo” muxbiri bilan suhbatda “O‘zatom” agentligi huzuridagi AES qurilishi direksiyasi direktori Otabek Omonov maʼlum qildi.
Otabek Omonovning aytishicha, Jizzax viloyatida AES qurilish ishlari joriy yil avgust oyi boshida boshlanadi.
Shartnomaga asosan har biri 55 MW quvvatli 6 ta reaktor (jami 330 MW) qurilishi rejalashtirilgan. Birinchi blok 6 ta blokdan iborat bo‘ladi va u 5 yildan keyin ishga tushadi. Qolganlari reja bo‘yicha 6 oydan 1 yilgacha (har biri) bo‘lgan vaqtda qurib bitkaziladi. Umumiy hisobda AES 7-8 yil ichida to‘liq ishga tushiriladi. Stansiyaning umumiy maydoni 50 gektarga yaqin. To‘liq ishga tushsa, yiliga 2,7–3 milliard kilovatt soat atrofida elektr energiyasi ishlab chiqaradi. Bu taxminan o‘rta hisobda bitta viloyatning uchdan bir qismini tok bilan taʼminlab beradi degani, dedi mutaxassis.
--D6cNkld.jpg)
Suhbatda Otabek Omonov AES qurilish ishlariga mahalliy korxonalar maksimal darajada jalb qilinishini aytdi.
AES bosh pudratchisi Rossiyaning “Rosatom” tuzilmasidagi “Atomstroyeksport” AJ bo‘ladi. Ular bilan tuzilgan shartnomada mahalliylashtirish punkti bor. Mahalliy quruvchilar, mashinasozlik sanoatimiz, qurilish materiallari ishlab chiqarish sanoatimizni AES qurilishiga yo‘naltirishimiz kerak. Qolaversa, o‘zimizning kadrlarni ham bu ishga jalb qilamiz. O‘zbekistonda kabel ishlab chiqarish sanoati yaxshi rivojlangan. Mahalliy kabel ishlab chiqaruvchilarni loyihamizga qo‘shishni rejalashtirganmiz, dedi direksiyasi direktori.
Maʼlum qilinishicha, AES qurilishida ishtirok etish yoki mahsulot yetkazishda quruvchilar va qurilish materiallari MAGATE talablariga javob berishi kerak. Ular chet el kompaniyalari tekshiruvidan o‘tib, maxsus litsenziya olgachgina tenderda qatnashadi. G‘olib bo‘lsa, qurilishda ishtirok etadi yoki mahsulotlarni yetkazib berishi mumkin bo‘ladi.
AES qurilishiga 5 ming kishi jalb etiladi. Jarayonga mingga yaqin texnika olib kelinadi.
Izoh (0)