O‘zbekiston elchisi Muhsinxo‘ja Abdurahmonov Yaponiyaning Daito Trust Construction korporatsiyasi prezidenti Kei Takeuchi bilan uchrashuv o‘tkazdi. Bu haqda “Dunyo” AA xabar berdi.
Maʼlum qilinishicha, uchrashuvda O‘zbekistonga xorijiy investitsiyalar, yuqori texnologiyalarni jalb qilish, chet el kompaniyalari bilan taʼlim va migratsiya sohasida hamkorlikni yo‘lga qo‘yish va rivojlantirish masalalari muhokama qilindi.
Qurilish-arxitektura va muhandislik sohalarida mamlakatimizda yuqori malakali kadrlarni tayyorlash va ularni yapon korporatsiyasida malakasini oshirish, stajirovkalar tashkil etish va ishga joylashtirish xususida fikr almashildi.
Korporatsiya prezidenti Kei Takeuchi O‘zbekistonda amalga oshirilayotgan keng ko‘lamli qurilish ishlarida yapon texnologiyalarini tatbiq qilish, seysmik xavfsizlik va zilzilalarga bardoshli yapon qurilish standartlarini joriy qilishga ko‘maklashishga tayyorligini bildirdi.
Uchrashuv yakunida Daito Trust Construction korporatsiyasi rahbariyatining O‘zbekistonga tashrifini tashkil etish hamda 2024-yildan boshlab bosqichma- bosqich o‘zbekistonlik 100 ga yaqin yuqori malakali muhandis kadrlarni Yaponiyada malakasini oshirish va ishga qabul qilish to‘g‘risida kelishib olindi.
Izoh (0)