Navoiy, Samarqand va Farg‘ona viloyatlarida haydovchilik guvohnomalarini noqonuniy yo‘l bilan olib berishini vaʼda qilgan shaxslar ushlandi. Bu haqda Bosh prokuratura huzuridagi departament xabar berdi.
Qayd etilishicha, departamentning Navoiy viloyat boshqarmasi tomonidan tezkor tadbir o‘tkazilgan. Tadbirda “A.v.” MCHJ avtomaktabi rahbari Z.M. fuqaro Sh.J.ning ishonchiga kirib, go‘yoki YHXBda ishlovchi tanishlari yordamida Sh.J. va uning turmush o‘rtog‘iga haydovchilik guvohnomalarini olib berishi evaziga 1 000 dollarni olgan vaqtida ashyoviy dalillar bilan ushlangan.
Shu kabi, departamentning Farg‘ona viloyat boshqarmasi IIB xodimlari hamkorligida o‘tkazilgan tezkor tadbirda M.M. ismli shaxs fuqaro A.Q.ga 1,3 ming dollar evaziga o‘quv kurslariga qatnashmasdan haydovchilik guvohnomasini olib berishini vaʼda qilib, oldindan 1 000 dollarni olgan vaqtida ashyoviy dalillar bilan qo‘lga olingan.
Xuddi shunday, departamentning Samarqand tuman bo‘limi va IIB xodimlari hamkorligida o‘tkazilgan tezkor tadbirda U.T. va Sh.A. ismli shaxslar fuqaro M.A.ga tanishlari yordamida 1 000 dollar evaziga haydovchilik guvohnomasini olib berishlarini aytib, shundan 500 dollarni olgan vaqtlarida ashyoviy dalillar bilan ushlangan.
Mazkur holatlar yuzasidan Jinoyat kodeksining 25, 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Bundan oldin Toshkent viloyatida soxta sertifikat evaziga haydovchilik guvohnomasi olgan fuqaroga sud hukmi o‘qilgandi. Unga Jinoyat kodeksining 59-moddasiga asosan tayinlangan jazolarni qisman qo‘shish yo‘li bilan uzil-kesil o‘tash uchun ish haqining 20 foizini davlat daromadi hisobiga ushlab qolgan holda 2,5 yil muddatga axloq tuzatish ishlari jazosi tayinlangan. May o‘rtalarida Farg‘onada 200 dollarga “prava” olib berishni va’da qilgan avtomaktab rahbari ushlangandi.
Izoh (0)