Toshkent shahri Sergeli tumanida MCHJni qasddan bankrotlikka olib kelish holati aniqlandi. Bu haqda Bosh prokuratura huzuridagi departament xabar berdi.
Qayd etilishicha, departamentning Sergeli tuman bo‘limi tomonidan tergovga qadar tekshiruv o‘tkazilgan. Tekshiruvda “S.T.” MCHJ masʼul shaxslari umumiy bahosi 1,9 milliard so‘mlik avtotransport vositalarini MCHJ balansidan chiqarib, korxonani to‘lovga qobiliyatsizligini qasddan yuzaga keltirib, kreditorning manfaatlariga juda ko‘p miqdorda zarar yetkazgani aniqlangan.
Shuningdek, ular yer qaridan qazib olingan foydali qazilmalar hajmini soliq hisobotlarida kamaytirib ko‘rsatib, 256 million so‘m soliqlarni to‘lashdan qasddan bo‘yin tovlagani ma’lum bo‘lgan.
Mazkur holatlar yuzasidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Sirdaryoda tadbirkorning traktorini 240 mln so‘mga sotib yuborgan ishchiga jinoyat ishi qo‘zg‘atilgani, Qashqadaryoda korxonani qasddan bankrotlikka olib kelish holati aniqlangani to‘g‘risida xabar berilgandi.
Izoh (0)