Sirdaryoda tadbirkorning traktorini 240 mln so‘mga sotib yuborgan ishchiga jinoyat ishi qo‘zg‘atildi

Sirdaryo tumanida tadbirkorning mulkini o‘zlashtirgan shaxs aniqlandi, deb xabar beradi Bosh prokuratura huzuridagi departament.

Qayd etilishicha, departamentning Sirdaryo tuman bo‘limi tomonidan tadbirkorlik subyektlarining huquqlarini himoya qilish yuzasidan tergovga qadar tekshiruv o‘tkazilgan. Tekshiruvda fuqaro Sh.K. “I.R.M.” MCHJning o‘ziga ishonib topshirilgan “BELARUS 80X” rusumli traktorini boshqa bir fuqaro X.N.ning nomidagi “BELARUS 80X” rusumli traktorining zavod ishlab chiqarish raqamlari yozilgan birkani ko‘chirib o‘tkazish orqali fuqaro M.A.ga 240 million so‘mga sotib yuborib, o‘zganing mulkini o‘zlashtirish yo‘li bilan talon-toroj qilgani aniqlangan.

Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.

Avvalroq Qashqadaryoda tomchilatib sug‘orish uskunalarini o‘zlashtirgan fermer xo‘jaliklari aniqlangani, Namanganda 545 mln so‘m kreditni talon-toroj qilgan korxona rahbarlari ushlangani, Nukusdagi ko‘zi ojizlar kutubxonasida 670 mln so‘m talon-toroj qilingani to‘g‘risida xabar berilgandi.