Surxondaryo viloyati Termiz tumanida rahbar qarzlarni to‘lamaslik uchun o‘z korxonasini bankrotlikka olib keldi. Bu haqda Iqtisodiy jinoyatlarga qarshi kurashish departamenti axborot xizmati xabar berdi.
Unga ko‘ra, holat Bosh prokuratura huzuridagi departamentning Surxondaryo viloyati boshqarmasi tomonidan o‘tkazilgan tergovga qadar tekshiruvda aniqlangan. “P.T.” MCHJ rahbari A.T. va boshqalar MCHJning 841,8 million so‘m debitorlik qarzdorligi mavjud bo‘lsa-da, MCHJni to‘lovga qobiliyatsiz deb topish va tugatishga doir ish yuritish jarayonida ushbu ma’lumotlarni yashirgan. Termiz tumanlararo Iqtisodiy sudining tugatish to‘g‘risidagi ajrimiga asosan 369,9 million so‘m soliq qarzini hisobdan chiqarib, soliq va boshqa majburiy yig‘imlarni to‘lashdan bo‘yin tovlab, MCHJni qasddan to‘lovga qobiliyatsizligiga (bankrotlikka) olib kelganliklari aniqlangan.
Mazkur holat yuzasidan Jinoyat kodeksining 184-moddasi (soliqlar yoki yig‘imlarni to‘lashdan bo‘yin tovlash) va 181-1-moddasi (qasddan bankrotlikka olib kelish) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)