Samarqand va Toshkent viloyatlarida MCHJlarni qasddan bankrotlikka olib kelish holatlari aniqlandi, deb xabar beradi Bosh prokuratura huzuridagi departament.
Qayd etilishicha, departamentning Samarqand viloyat boshqarmasi tomonidan tergovga qadar tekshiruv o‘tkazilgan. Tekshiruvda “Sh.B.” MCHJ rahbari F.A. MCHJ Samarqand shahri Firdavsiy ko‘chasida qurilgan ko‘p qavatli uylarning 70 ta xonadonini yaqin qarindoshlari va tanishlarining nomiga rasmiylashtirib berib, jami 10,5 milliard so‘mni MCHJ hisob raqamiga kirim qilmasdan, MCHJni qasddan bankrotlik holatiga olib kelgani aniqlangan.
Shu kabi, departamentning Ohangaron shahar bo‘limi tomonidan o‘tkazilgan tergovga qadar tekshiruvda “O-T.” MCHJ rahbari L.K. “A.” xususiy korxonasidan xarid qilingan 346,9 million so‘mlik dori vositalari sotuvidan tushgan mablag‘larni MCHJ hisob raqamiga kirim qilmasdan “O.-T.” MCHJni qasddan bankrotlik holatiga olib kelgani aniqlangan.
Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish), 181-1-moddasi (qasddan to‘lovga qobiliyatsizlikka olib kelish) va 189-moddasi (savdo yoki xizmat ko‘rsatish qoidalarini buzish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Sirdaryoda tadbirkorning traktorini 240 mln so‘mga sotib yuborgan ishchiga jinoyat ishi qo‘zg‘atilgani, Qashqadaryoda korxonani qasddan bankrotlikka olib kelish holati aniqlangani to‘g‘risida xabar berilgandi.
Izoh (0)