Toshkent viloyati Zangiota tumanidagi temir yo‘l hududida 10 yoshli bolani poyezd urib yubordi. Bu haqda “Millar” informatsion dasturida ma’lum qilindi.
Qayd etilishicha, 20-iyun kuni soat 09:30 larda “O‘zbekiston” bekatida xavfsizlikni ta’minlash bo‘linmasi xizmat telefoniga Zangiota temir yo‘l kesishmasida Bekobod—Toshkent yo‘nalishida harakatlangan elektropoyezd voyaga yetmagan bolani urib yuborgani to‘g‘risida xabar kelib tushgan.
Dastlabki ma’lumotlarga ko‘ra, bola velosiped yordamida poyezd yo‘lini kesib o‘tmoqchi bo‘lgan. U olgan tan jarohatlari oqibatida hodisa joyida vafot etgan.
Holat yuzasidan tergov harakatlari olib borilmoqda.
May oyining boshlarida Andijon viloyatida poyezd 8 yoshli qizaloqni urib yuborgani to‘g‘risida xabar berilgandi. Undan oldin esa Toshkent viloyatida 31 yoshli erkak poyezd urib ketishidan halok bo‘lgan edi.
Izoh (0)