Farg‘ona viloyatida relsda quloqchin taqib o‘tirgan 28 yoshli yigit poyezd bosib ketishi oqibatida halok bo‘ldi. Bu haqda “Bu kun” informatsion dasturida ma’lum qilindi.
Qayd etilishicha, tonngi soat 06:00 larda Uchko‘prik tumanida yashovchi 28 yoshli yigit temiryo‘l bo‘ylab ketayotganida telefonga chalg‘ib, relsga o‘tirgan. Shu vaqt Buvayda—Qo‘qon yo‘nalishida harakatlanib kelayotgan yuk poyezdi uni bosib ketgan.
Ma’lumotlarga ko‘ra, Farg‘ona viloyati IIB Transportda xavfsizlikni ta’minlash boshqarmasi xizmat hududi 243 kilometrni tashkil etadi. Ushbu hududda jami 53 ta kesishma mavjud bo‘lib, ularning 18 tasi qamrovga olingan (qo‘riqlanadigan), 35 tasi vaqtincha qo‘riqlanmaydigan hisoblanadi.
Poyezdlar bilan bog‘liq fojiali holatlar
2022-yilda Toshkent viloyatida bir kunda ikki kishi poyezd urib ketishidan vafot etgani, Jizzaxda poyezd temiryo‘lda quloqchin taqib ketayotgan fuqaro sabab favqulodda to‘xtagani, Toshkent—Xo‘jakent poyezd yo‘lida uxlab qolgan mast fuqaroning hayoti saqlab qolingani to‘g‘risida xabar berilgandi.
Shuningdek, Jizzax viloyati G‘allaorol tumanida “Afrosiyob” tezyurar poyezdi ikki nafar bolani urib ketgan edi. Bundan tashqari, Rossiyada o‘zbekistonlik yigitni poyezd bosib ketgani, Qoraqalpog‘istonda poyezd bosib ketgan erkakning boshi uzilib tushgani haqida ma’lum qilingandi.
Izoh (0)