Turkiya xalqaro standartlarga muvofiq kengaytirilgan talablarni joriy etgan holda aeroportlarda shaxsiy yuklarni tekshirish qoidalari va tartiblarini kuchaytirishi mumkin. Bu haqda “TASS” xabar berdi.
Tegishli qonun loyihasi parlament komissiyasi darajasida eshituvlardan o‘tgan va kelgusi haftada qonun chiqaruvchi organning yig‘ilishiga kiritilishi mumkin. U qabul qilingan taqdirda Turkiya aeroportlarida xavfsizlik qoidalari Xalqaro fuqaro aviatsiyasi to‘g‘risidagi konvensiyaga (“Chikago konvensiyasi”) muvofiq amalga oshiriladi.
Aeroport xodimlari zarur hollarda terminalga kirishda va bortga chiqishda yo‘lovchilarning buyumlarini qo‘lda tekshiradi. Bu shaxsiy yukka ham, elektron qurilmalarga ham aloqador. Tekshiruvga qarshilik ko‘rsatgan yo‘lovchi aeroportga yoki uchish zonasiga kiritilmaydi. Tekshiruv politsiya nazorati ostida xususiy xavfsizlik xodimlari tomonidan amalga oshiriladi. Boshqa barcha yuklar uchun ham xuddi shunday rejim joriy etiladi.
Bagajni tekshirish, agar xavfsizlik nuqtayi nazaridan talab etilsa, egasining ishtirokisiz ham o‘tkazilishi mumkin. Taqiqlangan buyumlar joyida musodara qilinadi. Ushbu tartib yo‘lovchining salonga olib kiradigan yukiga ham, ro‘yxatdan o‘tish vaqtida tekshirtirilgan yukiga ham tegishli. Bagaj tarkibini nazorat qilish bo‘yicha chora-tadbirlar texnik vositalar va rentgen skanerlari yordamida tekshirishni o‘z ichiga oladi.
Bundan tashqari, qonun loyihasida uchuvchining parvoz vaqtida bortda qonun buzilishi holatlari haqida rasmiy organlarga xabar bermagani uchun jarima (620 dollardan 15,6 ming dollargacha) joriy etilgan.
Izoh (0)