Kelgusi 10 yil davomida AQSH tashqi qarzi 56 trillion dollardan oshishi mumkin. Bu haqda AQSH Kongressi Byudjet byurosi bergan hisobotga asoslanib, New York Times xabar berdi.
Manbada aytilishicha, 18-iyun kuni Byudjet byurosi eʼlon qilgan prognozlar AQSH uchun o‘ta salbiy natijalarni keltirgan. Unga ko‘ra, mamlakat qarzi bir yarim barobardan ko‘proqqa oshishi kutilmoqda.
56 trillion dollarlik tashqi qarz 2034-yilda kuzatilishi mumkinligi xabar qilingan. Hozirning o‘zida AQSHda xarajatlarning soliq tushumlaridan ortiqligi qarzlarga qarshi milliy iqtisodiyotni himoya qilish harakatini yo‘qqa chiqarmoqda.
AQSHda so‘nggi yillarda ijtimoiy taʼminot va sog‘liqni saqlash sohasiga davlat yordami hajmi oshgan. Mamlakatda foiz stavkalari muntazam oshib bormoqda. Bu holatlar esa mamlakat moliyasi uchun og‘irlik qilmoqda.
2024-yilda AQSHda byudjet taqchilligi 1,9 trillion dollarga yetishi prognoz qilingan. Bu yil boshidagi prognozdan 1,6 trillion dollarga ko‘p. Kelgusi 10 yil ichida yillik kamomad 2,9 trillion dollargacha oshishi kutilmoqda.
2034-yilga borib davlat qarzining iqtisodiyotga nisbati 122 foizga yetishi maʼlum qilingan. Hozirda esa bu nisbat 99 foizni tashkil etadi.
Demokratlar ham, respublikachilar ham milliy qarz haqida xavotir bildirgan. AQSH hukumati bunday og‘ir sharoitda ijtimoiy xarajatlarni qisqartirish yo‘lidan borishi mumkinligi taxmin qilingan. Chunki mamlakatdagi ko‘p sonli keksalar hamda nogironlik nafaqasini oluvchilar davlat byudjetining katta ulushini o‘zlashtirmoqda.
Izoh (0)