Ozarbayjon Mudofaa vazirligi Armaniston va Fransiyani Janubiy Kavkaz mintaqasida konfliktni avj oldirishda aybladi. Bu haqda “Haqqin.az” xabar berdi.
Vazirlik bayonotiga ko‘ra, Fransiya ogohlantirishlarga qaramay, Armanistonni halokatli artilleriya va boshqa qurollar bilan ta’minlashda davom etmoqda.
“Fransiyaning Armanistonni halokatli va hujumkor artilleriya tizimlari va boshqa turdagi qurollar bilan ta’minlashi Janubiy Kavkaz mintaqasidagi provokatsion faoliyatining yana bir dalilidir”, — deyiladi bayonotda.
Ikki davlat o‘rtasida Caesar o‘ziyurar artilleriya tizimlarini sotib olish bo‘yicha imzolangan shartnoma buni tasdiqlashi ta’kidlangan.
“Armanistonni halokatli qurollar bilan ta’minlash bo‘yicha joriy harbiy kelishuv Fransiya rahbariyati ikkiyuzlamachiligining yana bir ko‘rinishidir”, — dedi Ozarbayjon Mudofaa vazirligi.
Shuningdek, vazirlik Parijni Armaniston va Ozarbayjon munosabatlarining normallashuviga to‘sqinlik qilayotganlikda ayblab, Fransiya siyosatini “militarizatsiya va geosiyosiy intriga” deb atadi.
“Makron rejimi Janubiy Kavkaz mintaqasida harbiylashtirish va geosiyosiy intriga siyosatini olib borar ekan, Armaniston va Ozarbayjon o‘rtasidagi munosabatlarning normallashuviga va mintaqada barqaror tinchlikka to‘sqinlik qilmoqda”, — deyiladi bayonotda.
Vazirlik Fransiya Armanistonni qurollantirish orqali “siyosiy javobgarliksiz yangi urushga yo‘l ochayotgani”ni ta’kidladi.
“Fransiya kolonial imperiya sifatida dunyoning turli burchaklarida urush va mojaro o‘choqlarini yaratish bo‘yicha boy tajribaga ega, bu jirkanchlik. Yangi Kaledoniya va boshqa kolonial hududlarida sodir bo‘layotgan jarayonlar, mahalliy xalqlarning ekspluatatsiyasi, tabiiy boyliklarining talon-taroj qilinishi, irqchilik siyosati natijasida bu hududlarning demografik tarkibining o‘zgarishi, norozilik namoyishlarini kuch ishlatish yoki qurol bilan bostirish — bularning barchasi Makron rejimining asl mohiyatidan dalolat beradi.
Armanistonning revanshist rahbariyati va Makron diktaturasi Janubiy Kavkaz mintaqasida vaziyatning keskinlashuvi va yangi urush o‘chog‘ining paydo bo‘lishi uchun to‘liq javobgarlikni o‘z zimmasiga olishini ma’lum qilamiz”, — deyiladi Mudofaa vazirligi bayonotida.
Izoh (0)