Turkiya Tojikiston fuqarolari uchun vizasiz rejimni bekor qildi. Bu haqda prezident Rajab Toyyib Erdo‘g‘onning qarorida aytilgan. Hujjat prezidentning rasmiy nashrida e’lon qilindi.
“Tojikistonning chet el pasportiga ega bo‘lgan fuqarolari uchun Turkiyaga sayohat qilishda vizasiz rejimni bekor qilishga qaror qilindi”, — deyiladi hujjatda.
Mazkur chora “Chet elliklar va xalqaro himoya to‘g‘risida”gi qonun asosida qabul qilingan. Qaror e’lon qilingan paytdan e’tiboran kuchga kiradi.
Tojikiston fuqarolari 2018-yildan buyon Turkiyada 90 kungacha vizasiz yurishlari mumkin edi.
22-mart kuni Moskva viloyatidagi Crocus City Hall’da yuz bergan teraktdan so‘ng Turkiya hujum uchun mas’uliyatni o‘z zimmasiga olgan ISHID tarafdorlariga qarshi reydlar o‘tkazdi.
Hürriyet gazetasining yozishicha, qo‘lga olinganlar orasida 37 yoshli Tojikiston fuqarosi Faziljon A. ham bo‘lib, u 41 yoshli Qirg‘iziston fuqarosi Zulfiya S. bilan Turkiyada hujum uyushtirishga tayyorlangan. “Abu Ismoil” shartli nomi ostidagi tojikistonlik erkak hujum ijrosini ta’minlashi, qirg‘izistonlik ayol esa unga yordam ko‘rsatishi kerak bo‘lgan. Nashr ma’lumotlarga ko‘ra, ularning ikkisi ham uzoq vaqtdan beri ISHID a’zosi hisoblanadi.
ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)