Туркия халқаро стандартларга мувофиқ кенгайтирилган талабларни жорий этган ҳолда аэропортларда шахсий юкларни текшириш қоидалари ва тартибларини кучайтириши мумкин. Бу ҳақда “ТАСС” хабар берди.
Тегишли қонун лойиҳаси парламент комиссияси даражасида эшитувлардан ўтган ва келгуси ҳафтада қонун чиқарувчи органнинг йиғилишига киритилиши мумкин. У қабул қилинган тақдирда Туркия аэропортларида хавфсизлик қоидалари Халқаро фуқаро авиацияси тўғрисидаги конвенцияга (“Чикаго конвенцияси”) мувофиқ амалга оширилади.
Аэропорт ходимлари зарур ҳолларда терминалга киришда ва бортга чиқишда йўловчиларнинг буюмларини қўлда текширади. Бу шахсий юкка ҳам, электрон қурилмаларга ҳам алоқадор. Текширувга қаршилик кўрсатган йўловчи аэропортга ёки учиш зонасига киритилмайди. Текширув полиция назорати остида хусусий хавфсизлик ходимлари томонидан амалга оширилади. Бошқа барча юклар учун ҳам худди шундай режим жорий этилади.
Багажни текшириш, агар хавфсизлик нуқтайи назаридан талаб этилса, эгасининг иштирокисиз ҳам ўтказилиши мумкин. Тақиқланган буюмлар жойида мусодара қилинади. Ушбу тартиб йўловчининг салонга олиб кирадиган юкига ҳам, рўйхатдан ўтиш вақтида текширтирилган юкига ҳам тегишли. Багаж таркибини назорат қилиш бўйича чора-тадбирлар техник воситалар ва рентген сканерлари ёрдамида текширишни ўз ичига олади.
Бундан ташқари, қонун лойиҳасида учувчининг парвоз вақтида бортда қонун бузилиши ҳолатлари ҳақида расмий органларга хабар бермагани учун жарима (620 доллардан 15,6 минг долларгача) жорий этилган.
Изоҳ (0)