Yaman qirg‘oqlari yaqinida 11-iyun kuni muhojirlar kemasi cho‘kib ketishi oqibatida kamida 49 kishi halok bo‘ldi. Bu haqda Xalqaro migratsiya tashkiloti tarqatgan xabarga asoslanib, Anadolu nashri xabar berdi.
Manbada aytilishicha, halok bo‘lganlar orasida 31 nafar ayol va 6 ta voyaga yetmagan bola bo‘lgan. Muhojirlar Yaman orqali Fors ko‘rfazi mamlakatlariga o‘tishni rejalashtirgan.
Rasmiylar kema ichida jami 260 kishi bo‘lganini yozgan. Kema Yamanning Shabva viloyatidagi Alg‘arif punkti yaqinida ag‘darilib ketgan.
“Yaqinda sodir bo‘lgan fojia migratsiya muammolarini hal qilish va migratsiya yo‘llari bo‘ylab muhojirlarning xavfsizligi va salomatligini taʼminlash bo‘yicha birgalikda ishlash zarurligini yana bir bor eslatadi”, — degan Xalqaro migratsiya tashkiloti matbuot kotibi Muhammadali Abunajela.
Kema Somalidagi Bossaso shahridan yo‘lga chiqqan. Undagi muhojirlarning 115 nafari Somali fuqarolari va qolgan 145 nafari Efiopiyaliklar bo‘lgan, 260 kishidan 90 nafari ayollar bo‘lgan.
Yaman rasmiylari Qizil dengiz atrofidagi mamlakatlarga ogohlantirish yo‘llab, o‘z suv hududlarida tekshiruv o‘tkazishni so‘ragan. Bedarak yo‘qolganlarni qidirish bo‘yicha operatsiya o‘tkazish so‘ralgan.
Izoh (0)