Яман қирғоқлари яқинида 11 июнь куни муҳожирлар кемаси чўкиб кетиши оқибатида камида 49 киши ҳалок бўлди. Бу ҳақда Халқаро миграция ташкилоти тарқатган хабарга асосланиб, Anadolu нашри хабар берди.
Манбада айтилишича, ҳалок бўлганлар орасида 31 нафар аёл ва 6 та вояга етмаган бола бўлган. Муҳожирлар Яман орқали Форс кўрфази мамлакатларига ўтишни режалаштирган.
Расмийлар кема ичида жами 260 киши бўлганини ёзган. Кема Яманнинг Шабва вилоятидаги Алғариф пункти яқинида ағдарилиб кетган.
“Яқинда содир бўлган фожиа миграция муаммоларини ҳал қилиш ва миграция йўллари бўйлаб муҳожирларнинг хавфсизлиги ва саломатлигини таъминлаш бўйича биргаликда ишлаш зарурлигини яна бир бор эслатади”, — деган Халқаро миграция ташкилоти матбуот котиби Муҳаммадали Абунажела.
Кема Сомалидаги Боссасо шаҳридан йўлга чиққан. Ундаги муҳожирларнинг 115 нафари Сомали фуқаролари ва қолган 145 нафари Эфиопияликлар бўлган, 260 кишидан 90 нафари аёллар бўлган.
Яман расмийлари Қизил денгиз атрофидаги мамлакатларга огоҳлантириш йўллаб, ўз сув ҳудудларида текширув ўтказишни сўраган. Бедарак йўқолганларни қидириш бўйича операция ўтказиш сўралган.
Изоҳ (0)