Germaniya hukumati mamlakat mudofaa salohiyatini kuchaytirish uchun qo‘shimcha 20 ta Eurofighter qiruvchi samolyotlariga buyurtma berdi. Bu haqda Germaniya kansleri Olaf Shols eʼlon qilgan bayonotga asoslanib, The Defense Post manbasi xabar berdi.
Manbada aytilishicha, hukumat Airbus kompaniyasiga allaqachon buyurtma bergan. Harbiy xarid haqidagi qaror Mudofaa vazirligi tavsiyasidan so‘ng ishlab chiqilgan.
Kansler Olaf Shols Berlindagi Xalqaro havo ko‘rgazmasida ushbu boradagi maxsus bayonotni eʼlon qilgan. Qiruvchi samolyotlar 2025-yilda Germaniyada o‘tkaziladigan umumiy saylovlarga qadar Mudofaa vazirligiga topshirilishi aytilgan.
Germaniya rasmiylari 2020-yilda ham 38 ta Eurofighter qiruvchi samolyotlariga buyurtma bergan. Ushbu buyurtmadan maqsad eski namunadagi Tornado samolyotlarini yangi ko‘rinishdagi qiruvchilar bilan almashtirish bo‘lgan.
2023-yilda Germaniya hukumati Yevropa sharqida avj olgan Rossiya va Ukraina urushi fonida maxsus mudofaa byujeti eʼlon qilgan edi. Ushbu byudjet 100 milliard yevro (109 milliard dollar) hajmida bo‘lib, mudofaani kuchaytirish uchun ilg‘or harbiy texnika sotib olishni ko‘zda tutadi. Ushbu byudjet loyihasi qabul qilinishi ortidan Berlin hukumatida harbiy sohaga diqqat-eʼtibor kuchayib ketgani aytilgan.
Oldinroq NATO ittifoqchilari, shu jumladan Qo‘shma Shtatlar mudofaa xarajatlarida ortda qolayotgani uchun Germaniyani tanqid ostiga olgan edi. Mamlakat kansleri Olaf Shols 2024-yildan boshlab YIMning ikki foizini tashkil etuvchi NATO harbiy byudjeti bo‘yicha yillik rejani bajarishga vaʼda bergan edi.
Izoh (0)