Vengriya Rossiyaning muzlatilgan aktivlaridan tushgan daromadlarni Ukrainaning harbiy ehtiyojlariga o‘tkazishga to‘sqinlik qilmoqda, deya manbalarga tayanib, Financial Times (FT) xabar berdi.
Dastlabki kelishuvga ko‘ra, Yevropa Ittifoqi davlatlari Belgiyadagi Euroclear depozitariysida saqlanadigan 190 milliard yevro miqdoridagi Rossiya aktivlaridan tushgan daromaddan Ukrainaga har yili 2 milliard yevrogacha mablag‘ o‘tkazish niyatida edi. FT’ga ko‘ra, qaror bir ovozdan qabul qilinishi kerak edi, ammo Vengriya bunga qarshi ovoz bergan. Biroq, qonunga veto qo‘yilmagan.
Hozirda ular Ukrainani harbiy qo‘llab-quvvatlash bilan bog‘liq hamma narsaga to‘sqinlik qilmoqda, — dedi nashr suhbatdoshlaridan biri.
Yana bir FT manbasi Yevropa Ittifoqi rahbariyati Vengriyaga bloklangan aktivlar ulushi qurol sotib olishga ishlatilmasligi uchun kelishuv taklif qilganini aytgan. Uning so‘zlariga ko‘ra, shu tufayli Budapesht Yevropa Ittifoqi tomonidan ilgari surilgan mexanizmga veto qo‘ymagan, kechikishlar yaratish bilan cheklangan.
Avvalroq YI Rossiyaning muzlatilgan aktivlaridan tushgan daromadlarni Ukrainaga o‘tkazishni ma’qullagan edi. Kelishuvga ko‘ra, Yevropa depozitariylari Rossiya aktivlarini boshqarishdan olingan sof foydaning 99,7 foizini Yevropa Ittifoqi byudjetiga o‘tkazishlari, keyinchalik pul Ukrainaga yordam uchun yuborilishi kerak.
Kiyev foydaning potensial o‘tkazilishini qo‘llab-quvvatlagan, ammo Ukrainaning barcha harbiy ehtiyojlari bilan solishtirganda, bu miqdor deyarli hech narsa ekanligini ta’kidlagan.
Izoh (0)