G7 davlatlari Rossiya aktivlarini to‘liq musodara qilishni ortiq muhokama qilmaydi — OAV

G7 vakillari Rossiya aktivlarini to‘liq musodara qilish masalasini endi muhokama qilmaydi. Bu haqda Financial Times xabar berdi.

Ukraina Rossiya aktivlarini to‘liq musodara qilishga intilishda davom etar ekan, G7 rasmiylari bu mavzu endi muhokama qilinmayotganini ta’kidladi. Buning o‘rniga ular muzlatilgan aktivlardan moliyalashtirishning muqobil yo‘llarini o‘rganmoqda, — deb yozadi nashr.

Financial Times’ga ko‘ra, Yevropa davlatlari Rossiyaning “qasos olishidan xavotirlanib”, aktivlarning o‘ziga ta’sir qilishi mumkin bo‘lgan har qanday narsadan uzoq turishni istaydi.

Rossiya-Ukraina urushi boshlanganidan keyin G7 va Yevropa Ittifoqi davlatlari Rossiyaning qariyb 300 milliard yevrolik valyuta zaxiralarini muzlatib qo‘ygan. G‘arb davlatlari bu aktivlarni tortib olish va Kiyevga berish yo‘lini faol izlamoqda.

Kreml bunday qarorlarni qabul qilish xalqaro huquqning barcha qoidalari va normalarini buzish ekanini aytgan. Rossiya TIV aktivlarni muzlatishni o‘g‘irlik deb atab, bu qadamlar nafaqat jismoniy shaxslar mablag‘lariga, balki davlat aktivlariga ham qaratilganini ta’kidlagan.

Rossiya TIV rahbari Sergey Lavrovning aniqlik kiritishicha, Rossiyaning G‘arbdagi muzlatilgan aktivlari musodara qilingan taqdirda, Rossiya javob qaytaradi.

Moskvada G‘arb davlatlarining Rossiyadagi mavjud mablag‘larni qaytarmaslik imkoniyati ham bor, — deya qo‘shimcha qilgan Lavrov.