Germaniya hukumati Rossiyaning muzlatilgan aktivlarini musodara qilish va ulardan Ukrainaga yordam berish uchun foydalanish haqidagi AQSHning rejalariga ehtiyotkorona munosabatda, deya Deutsche Welle xabar berdi.
Bizning pozitsiyamiz o‘zgarishsiz qolmoqda: biz aktivlarning o‘zi haqida emas, muzlatilgan aktivlardan olingan daromad haqida gapiryapmiz, — dedi hukumat rasmiysi Shtefan Hebeshtrayt Berlindagi matbuot anjumanida.
Germaniya Moliya vazirligi vakili Rossiya aktivlaridan olingan daromadlar ishlatilishini qo‘shimcha qilgan, ammo Rossiya Markaziy bankining aktivlari daxlsiz bo‘lib qoladi.
Bu xalqaro huquqning davlat daxlsizligi kabi asosiy tamoyillari saqlanib qolganligini anglatadi, — deydi u.
Mazkur izohlar 24–25-may kunlari Italiyada bo‘lib o‘tadigan G7 davlatlarining moliya vazirlari yig‘ilishi oldidan bildirilgan. Uchrashuvda vazirlar Ukrainaga yordam berish uchun Rossiyaning muzlatilgan aktivlaridan foydalanish bo‘yicha umumiy pozitsiyani kelishish niyatida.
Avvalroq Amerikaning WSJ nashri Germaniya tovon to‘lashdan qo‘rqib, Rossiya aktivlarini musodara qilishga qarshi chiqayotganini aytgan edi. Nashrga ko‘ra, AQSH va Buyuk Britaniya Rossiya aktivlarini musodara qilishni Ukrainaning Rossiya bilan urushdagi g‘alabasi uchun “hal qiluvchi” chora deb hisoblagan.
AQSH davlat kotibi Entoni Blinken may oyida Kiyevga tashrifi chog‘ida hukumat Ukraina uchun Rossiyaning AQSH banklaridagi aktivlarini musodara qilish niyatida ekanini aytgan. Amerika banklarida Rossiyaning 5 milliard dollarlik aktivlari muzlatilgan. Dunyo bo‘ylab bu aktivlar taxminan 300 milliard dollarni tashkil qiladi. Ularning taxminan 200 milliard yevro qismi Yevropa Ittifoqida bloklangan.
Rossiya hukumati mamlakat mablag‘larini, shu jumladan, ulardan ko‘rilgan daromadlarni olib qo‘yishning har qanday variantini ekspropriatsiya deb hisoblab, bu yomon oqibatlarga olib kelishi haqida ogohlantirgan.
Izoh (0)