Rossiya armiyasi 25-may kuni Xarkovni o‘qqa tutdi. Odamlar gavjum bo‘lgan “Episentr” qurilish gipermarketi hujumga uchradi, 15 kishi halok bo‘ldi. Bu haqda Xarkov viloyati davlat administratsiyasi rahbari Oleg Sinegubovga tayanib, BBC xabar berdi.
Ma’lum qilinishicha, 43 kishi tan jarohati olgan, ulardan ikki nafarining ahvoli og‘ir, bir kishi kuyish asoratlari bilan reanimatsiyasida. 13 yoshli bola operatsiya qilingan. Halok bo‘lganlar orasida gipermarket xodimlari ham bor.
“Episentr” vakillarining so‘zlariga ko‘ra, hujum vaqtida gipermarketda 200 ga yaqin odam bo‘lgan, 16 kishi bedarak yo‘qolgan.
Snaryad lak va bo‘yoq materiallari bo‘lgan majmuaga tushgan, natijada yong‘in kelib chiqqan, — deydi Xarkov viloyati politsiyasi boshlig‘i Vladimir Timoshko.
Obyektga zarba berish uchun UMPB D-30 aviatsiya snaryadlaridan foydalanilgani aytilmoqda. Xarkovda yana bir hujum 25-may kuni tunda markaziy bog‘da sodir bo‘lgan, 25 kishi jarohatlangan. Yettita ko‘p qavatli turar joy, shifoxona, do‘kon, ilmiy-tadqiqot instituti binosi, avtomashinalar zarar ko‘rgan.
Izoh (0)