Rossiya Mudofaa vazirligi strategik bo‘lmagan yadro qurollari ishtirokida harbiy mashg‘ulotlar boshladi. Bu haqda vazirlik saytida xabar berildi.
Mashg‘ulotlar Ukraina bilan chegaraga yaqin Janubiy harbiy okrugda bo‘lib o‘tmoqda. Manyovrlarning birinchi bosqichi strategik bo‘lmagan yadro qurollarini tayyorlash va qo‘llash bo‘yicha amaliy mashg‘ulotlarni o‘z ichiga oladi. Unda “Iskander” va “Kinjal” raketa tizimlarining jangovar qo‘llanilishi sinovdan o‘tkaziladi.
Strategik qurollardan farqli o‘laroq, taktik yadro qurollarining kuchi bir necha kiloton trotil ekvivalentidan (portlash paytida chiqarilgan energiyaning umumiy qabul qilingan an’anaviy o‘lchov birligi) oshmaydi. Putin ko‘rsatmalariga muvofiq mashg‘ulotlarga Rossiya Qurolli kuchlari bosh shtabi rahbarlik qilmoqda.
Mashqlar davomida shaxsiy tarkib va texnikaning javob choralari uchun strategik bo‘lmagan yadro qurolidan foydalanishga tayyorligi sinovdan o‘tkaziladi, — deyiladi Mudofaa vazirligi xabarida.
Vazirlikning ta’kidlashicha, mashg‘ulotlar G‘arbning ayrim rasmiylarining Rossiyaga qarshi “provokatsion bayonotlari va tahdidlariga javoban” Rossiya davlatining hududiy yaxlitligi va suverenitetini ta’minlash maqsadida amalga oshirilmoqda.
Mashg‘ulotlarda Belarus ham ishtirok etadi
9-may kuni Putin Rossiya va Belarus harbiylari strategik bo‘lmagan yadro qurollarini sinovdan o‘tkazish bo‘yicha mashg‘ulotlarga birgalikda tayyorgarlik ko‘rishni boshlaganini aytdi.
Belarus hududida strategik bo‘lmagan yadro qurollari joylashgani sababli, bu safar ittifoqchilarimizni taklif qildik va Belarus prezidenti ushbu mashg‘ulot bosqichlaridan birida ishtirok etishni so‘radi, — dedi Rossiya prezidenti.
Shu bilan birga, u bunday mashg‘ulotlar 2024-yilda 3 bosqichda muntazam o‘tkazilayotganini ta’kidladi.
Ikkinchi bosqichda belaruslik hamkasblar harakatlarimizga qo‘shiladi, — deya qayd etdi Rossiya prezidenti.
Izoh (0)