Polsha ikki davlat chegaralari yaqinida Ukraina havo hududini himoya qilish uchun Rossiyadan uchirilgan raketalarni urib tushirmoqchi. Bu haqda Polsha Tashqi ishlar vazirligi spikeri Pavel Vronskiy xabar berdi.
Hozirda Polsha havo hujumidan mudofaa tizimlaridan foydalanish imkoniyatini ko‘rib chiqmoqda. Bu borada yakuniy qaror qabul qilingani yo‘q.
“Bu masala huquqiy va texnik nuqtayi nazardan ko‘rib chiqilmoqda, ammo bu ish bo‘yicha qarorlar yo‘q”, — dedi Vronskiy.
U Ukraina tomoni Polsha rasmiylariga shunday so‘rov bilan chiqqanini aytdi. Polsha Tashqi ishlar vazirligi spikeri bu imkoniyatni xalqaro huquq bo‘yicha ekspertlar va texnik mutaxassislar baholashi kerakligini bildirdi.
Vronskiyning taʼkidlashicha, havo hujumidan mudofaa tizimlarini Ukrainaga berish haqida gap ketmayapti, chunki bunday imkoniyat mavjud emas. Rossiya raketalarini yo‘q qilish uchun havo hujumidan mudofaa tizimlarini qo‘llash muhokamasi 24-martdan keyin boshlangan. O‘shanda Polsha Rossiya raketasi mamlakat havo hududini buzganini e’lon qilgan.
Eslatib o‘tamiz, 20-may kuni Ukraina prezidenti Vladimir Zelenskiy NATO davlatlarini Ukrainaga Rossiya raketalarini urib tushirishda yordam berishga, Rossiyaga hujumlarda G‘arb texnikasidan foydalanishga ruxsat berishga chaqirgandi.
Izoh (0)