NATO bosh kotibi Yens Stoltenberg Ukrainaga Rossiyadagi harbiy nishonlarga hujum qilish uchun G‘arb qurollaridan foydalanishga ruxsat berish kerakligini aytdi. Bu haqda u The Economist nashriga bergan intervyusida ma’lum qildi.
Ittifoqchilar Ukrainaga berilgan qurollardan foydalanishga qo‘yilgan ba’zi cheklovlarni olib tashlashi kerakligini o‘ylab ko‘rish vaqti keldi. Ayniqsa, hozirda janglarning aksariyati Xarkov viloyatida, chegaradan unchalik uzoq bo‘lmagan joyda sodir bo‘lmoqda. Ukrainani ushbu qurollarni Rossiyadagi qonuniy harbiy nishonlarga qarshi qo‘llash imkoniyatidan mahrum qilish uning o‘zini o‘zi mudofaa qilishiga katta xalaqit beradi, — dedi Stoltenberg.
Uning fikricha, rus qo‘shinlarining Xarkov viloyatidagi hujumi muvaffaqiyatga olib kelmaydi.
Ruslar katta yo‘qotishlarga duchor bo‘lgan holda bosim qilishda va kichik muvaffaqiyatlarga erishishda davom etadi, — deydi NATO bosh kotibi.
Stoltenberg ittifoqchilar Ukrainaga “bir million artilleriya o‘qlari” va’da qilib, buni amalga oshirmaganidan hayratlandi.
Bu nima ekanini eslashimiz kerak, bu Rossiyaning Ukrainaga qarshi agressiv urushidir. Ukraina o‘zini himoya qilishga haqli. Bu Rossiya hududidagi nishonlarga zarba berishni ham o‘z ichiga oladi, — dedi NATO bosh kotibi.
U mazkur urush Rossiya va alyans o‘rtasidagi keng ko‘lamli urushga aylanib ketishining oldini olish kerakligini bildirdi. Stoltenbergning taʼkidlashicha, NATO qo‘shinlari alyansga aʼzo bo‘lgan davlatlar hududidan yoki Ukraina hududidan urushda qatnashishni rejalashtirmaydi.
Biz Ukrainaga NATO quruqlik qo‘shinlarini yuborish niyatimiz yo‘q, chunki maqsadimiz Ukrainani qo‘llab-quvvatlash, shuningdek, bu keng ko‘lamli konfliktga aylanib ketmasligini ta‘minlash, — ta’kidladi alyans bosh kotibi.
Izoh (0)