G‘arb ittifoqchilarining Kiyevga harbiy yordam bo‘yicha qaror qabul qilishi cho‘zilmoqda. Bu haqda Ukraina prezidenti Vladimir Zelenskiy Reuters agentligiga bergan intervyusida ma’lum qildi.
Biz qabul qiladigan har bir qaror taxminan bir yilga kechikmoqda, — dedi Zelenskiy Ukrainaga qurol va o‘q-dorilar yetkazib berish bilan bog‘liq vaziyatni izohlar ekan.
Uning so‘zlariga ko‘ra, ayni damda Kiyev Rossiyaga havoda qarshi turish uchun zudlik bilan kamida 120-130 ta harbiy texnikaga muhtoj.
Hozir buni ta’minlay olmaysizmi, keling, NATO mamlakatlaridagi samolyotlarga qaytaylik. Ularni uchiring, nishonlarni o‘qqa tuting, tinch aholini himoya qiling, — dedi Zelenskiy.
Ukraina prezidenti ittifoqchi davlatlarni Rossiyaga qarshi mudofaa hujumiga ko‘proq jalb etish istagida. Zelenskiyga ko‘ra, hamma eskalatsiyasidan qo‘rqadi. Ukrainaliklar o‘layotgani odatiy hol — odamlar uchun bu keskinlik emas.
Zelenskiy shuningdek, Kiyev Rossiya hududida rus harbiy texnikasiga zarba berish uchun G‘arb qurollaridan foydalanish bo‘yicha muzokaralar olib borayotganini, ammo hozircha kelishuv yo‘qligini aytgan.
15-16 iyun kunlari Shveytsariyada bo‘lib o‘tadigan global tinchlik sammiti haqida gapirar ekan, Zelenskiy tadbirga imkon qadar ko‘proq davlatni yig‘ish zarurligini taʼkidlagan. U Rossiya faqat Ukraina oldida emas, balki dunyoning aksariyat davlatlari oldida javob berishi kerakligini qo‘shimcha qilgan.
Ukraina rahbari Xitoyning sammitdagi ishtiroki muhimligini eslatgan.
Sammitdan so‘ng kim urushni tugatishni va kim Rossiya bilan mustahkam aloqalarni saqlab qolishni istashi aniq bo‘ladi, — dedi Zelenskiy.
Prezident, shuningdek, so‘nggi bir necha oy ichida harbiy muvaffaqiyatsizlikka uchraganiga qaramay, Ukraina urushda g‘alaba qozonishi mumkinligini ham ta’kidlagan. U odamlar “g‘alaba” so‘zini shubha bilan qabul qilsalar ham, bu yo‘ldan oxirigacha borish kerakligini aytgan.
Izoh (0)