“Rossiya front chizig‘ida qo‘shinlarimizni zaiflashtira olmaydi” — Zelenskiy

O‘tgan haftada Ukraina qo‘shinlari Xarkov viloyatida o‘z pozitsiyalarini mustahkamlay oldi. Bu haqda Ukraina prezidenti Vladimir Zelenskiy axborotiga tayanib, Deutsche Welle ma’lum qildi.

Zelenskiyning so‘zlariga ko‘ra, Ukraina armiyasi Donetsk yo‘nalishida, xususan, Rossiya qo‘shinlari so‘nggi bir necha kundan beri bostirib kirishga urinayotgan Chasov Yar shahri hududlarida ham o‘z pozitsiyalarini yaxshilagan.

Bosqinchilar  qurolli kuchlarimizni zaiflashtirishga qaratilgan maqsadiga erishmayapti. Jangovar buyruqlarni bajarishda, o‘z pozitsiyalarimizni saqlab qolishda mard va matonatli har bir askar, serjant, har bir ofitserga minnatdorlik bildiraman, — dedi Zelenskiy.

Ukraina prezidenti qutqaruvchilarga, tez tibbiy yordam brigadalari feldsherlariga, shuningdek, Rossiya o‘qqa tutilishidan keyin normal hayotni tiklayotgan ta’mirlash brigadalariga minnatdorchilik bildirdi.

Avvalroq Rossiya qo‘shinlari Ukrainaning Xarkov viloyatidagi chegara hududlarini o‘qqa tutishni keskin kuchaytirgani aytilgandi. Ular bir qancha hududlarda hujum uyushtirib, bir qancha aholi punktlarini nazorat ostiga olgan.

19-may kuni Rossiya armiyasi Xarkov viloyatining bir qator qishloqlariga zarbalar bergan. Ma’lumotlarga ko‘ra, Xarkovdagi otishma natijasida 11 kishi halok bo‘lgan.

Putin Rossiya armiyasi Xarkovni egallash niyati yo‘qligini aytgan. U hujum operatsiyasini Ukraina armiyasining chegara hududlarini o‘qqa tutgani sababli Rossiyaning Ukraina bilan chegarasida “sanitariya zonasi” yaratish istagi bilan izohlagan.