Ukraina prezidenti Vladimir Zelenskiy OAV vakillari bilan suhbatlashdi. Uning so‘zlariga ko‘ra, Shveysariyada bo‘lib o‘tadigan tinchlik sammitida G‘arbdan energiya xavfsizligi va yadroviy inshootlar xavfsizligi kafolatlarini olishga umid qilmoqda. Ukraina prezidenti erkin navigatsiya uchun sharoit yaratilishini ham kutmoqda.
“Biz energiya xavfsizligini, jumladan, yadroviy xavfsizlikni olishni istaymiz. Chunki men bu borada hamma manfaatdor ekanligiga ishonaman va bu bizga yana bir qishga reja tuzish imkoniyatini berishi mumkin”, — dedi Zelenskiy. Ukraina prezidentining qo‘shimcha qilishicha, Rossiya mamlakat portlariga hujum qilmoqda.
Vladimir Zelenskiyning so‘zlariga ko‘ra, u Rossiya qo‘shinlarini Ukraina hududidan olib chiqib ketish rejasini ham ishlab chiqishga umid qilmoqda. Bunda imkon qadar ko‘proq davlatlar ishtirok etishi kerakligini taʼkidladi.
Shveysariyadagi konferensiya 15—16-iyun kunlariga mo‘ljallangan. Taklif etilgan 160 ta davlatdan 50 tasi ishtirok etishini tasdiqladi. Shveysariyaning RTS telekanaliga ko‘ra, Yevrokomissiya rahbari Ursula fon der Lyayen, Yevropa kengashi prezidenti Sharl Mishel, Germaniya kansleri Olaf Shols, Italiya bosh vaziri Jorjiya Meloni va Kanada bosh vaziri Jastin Tryudo ishtirok etishlarini tasdiqlagan.
Rossiya sammitga taklifnoma olmadi. Shveysariya TIV ma’lumotlariga ko‘ra, bunga Moskvaning tadbirga qiziqish bildirmagani sabab bo‘lgan. Bungacha Kreml Rossiya sammitda ishtirok etishdan manfaatdor emasligini bir necha bor taʼkidlagan edi. Ukraina Rossiya delegatsiyasining ishtirok etishiga qarshi chiqdi.
Izoh (0)