Isroil bosh vaziri Binyamin Netanyaxu Xalqaro jinoiy sud prokurori Karim Xon uni hibsga olish uchun order talab qilganiga munosabat bildirdi. Bu haqda Times of Israel xabar berdi.
Netanyaxu bosh prokurorning Isroil yetakchilarini hibsga olishga order berish haqidagi talabini “absurd va yolg‘on” deb atab, bu “yangi antisemitizm” ekanini ta’kidladi. Isroil bosh vaziri Xonning talabi butun Isroil davlatiga qarshi qaratilganini aytdi.
Bu HAMASga qarshi yuksak qahramonlik bilan kurashayotgan Isroil askarlariga qarshi qaratilgan. HAMASning yirtqichlarini dunyodagi eng axloqiy armiya bo‘lgan Isroil askarlari bilan solishtirishga qanday jur’at eta olasiz? Birodarlarimizni o‘ldirgan, yoqib yuborgan, zo‘rlagan va o‘g‘irlagan HAMAS bilan adolatli urush olib borayotgan Isroil askarlarini qanday jasorat bilan solishtirasiz?, — dedi u.
Netanyaxu Isroil armiyasi HAMASni ag‘darib, “to‘liq g‘alabaga erishishini” va’da qildi. U hech bir xalqaro forum Isroil uni yo‘q qilmoqchi bo‘lganlarga zarba berishiga to‘sqinlik qilmasligini aytdi.
Xalqaro jinoiy sud bosh prokurori Karim Xon aslida order bergani yo‘q, u 20-may kuni Netanyaxu, Isroil mudofaa vaziri Yoav Gallant, shuningdek, HAMASning uch nafar yetakchisi – Yahyo Sinvar, Muhammad Deif va Ismoil Haniyani hibsga olish uchun order berish niyatidaligini ma’lum qildi.
Isroil prezidenti Isaak Gertsog jinoiy sud prokurorining Netanyaxu va mudofaa vaziri Yoav Galantni hibsga olish uchun order berish haqidagi talabini “sharmandali” deb atagan. Bu kabi hodisalar xalqaro sud tizimi qulash arafasida ekanini ko‘rsatishini maʼlum qilgan.
Izoh (0)