Ukraina prezidenti Vladimir Zelenskiy 17-may kuni mahkumlarni harbiy xizmatga safarbar qilishga ruxsat beruvchi qonun loyihasini imzolagan. Bu haqda Ukraina mahalliy nashrlariga tayanib, “TASS” xabar berdi.
Manbada aytilishicha, yangi qonun milliy xavfsizlikka nisbatan tajovuzkor jinoyatlarda ayblanganlar, qotillar, jinsiy zo‘ravonlik tufayli qamalganlar, pedofillar, alkogol yoki giyohvand modda taʼsirida o‘limga olib kelgan avtohalokat sodir etgan haydovchilardan tashqari barcha mahkumlarni harbiy xizmatga chaqirishni nazarda tutadi.
“Loyiha prezident imzosi bilan tasdiqlandi”, — deyiladi Oliy Rada saytida eʼlon qilingan xabarda.
Ushbu qonun imzolanganidan bir kun o‘tib, 18-may sanasidan kuchga kirishi xabar qilingan. Qonun loyihasida mahkumlar harbiy xizmatga chaqirilish uchun o‘z roziligini berishi, shuningdek ularni tibbiy ko‘rikdan o‘tkazish tartibi belgilab berilgan.
Ukraina Adliya vazirligi uzoq vaqtdan beri mahkumlarni harbiy xizmatga olishga chaqirib kelgan. Adliya vaziri Denis Malyuska avvalroq minglab mahkumlar Ukraina armiyasi safiga qo‘shilish istagini bildirganini xabar bergan.
Vazir yangi qonun bilan kamida 50 ming nafar mahkum armiyaga olinishi mumkinligini aytgan. Ukraina hukumatining boshqa manbalari esa bu miqdorni 20 ming deb taxmin qilgan.
Izoh (0)