BMT Xavfsizlik kengashi Rossiya tomonidan tayyorlangan kosmosda qurol joylashtirmaslik haqidagi rezolyutsiya loyihasini blokladi. Xavfsizlik kengashiga aʼzo 15 davlatdan 7 tasi loyihaga qarshi ovoz berdi. Bu haqda “TASS” xabar qildi.
Rezolyutsiya loyihasini yettita davlat, jumladan, Rossiya va Xitoy qo‘llab-quvvatladi. Shveysariya ovoz berishda betaraf qoldi. Rezolyutsiyani qabul qilish uchun BMT Xavfsizlik kengashining kamida to‘qqiz a’zosi loyihani qo‘llab-quvvatlashi zarur. Rossiyaning tashkilotdagi doimiy vakili Vasiliy Nebenzyaning aytishicha, Xavfsizlik kengashi qarorining rad etilishi AQSHning koinotni harbiylashtirish niyatidan dalolat beradi.
Bugun ular kosmosni harbiylashtirishni davom ettirish va tegishli qurollarni yaratish bo‘yicha o‘zlarining haqiqiy niyatlarini tasdiqlaganidan so‘ng, loyihamizning go‘yoki konsensusga ega bo‘lmagani bilan o‘z harakatlarini oqlashga urinishlari bema’nilik va ikkiyuzlamachilikka o‘xshaydi, — dedi Nebenzya.
Rossiya aprel oyida BMT Xavfsizlik kengashida Yer orbitasiga yadroviy qurol va boshqa ommaviy qirg‘in qurollarini joylashtirishni taqiqlovchi AQSH—Yaponiya rezolyutsiyasiga veto qo‘ygandi. O‘shanda Nebenzya hujjatni qo‘llab-quvvatlashdan bosh tortishini taqiq nafaqat yadro quroliga, balki oddiy qurollarga ham tegishli bo‘lishi kerakligi bilan izohlagandi.
Izoh (0)