Ғарб иттифоқчиларининг Киевга ҳарбий ёрдам бўйича қарор қабул қилиши чўзилмоқда. Бу ҳақда Украина президенти Владимир Зеленский Reuters агентлигига берган интервьюсида маълум қилди.
Биз қабул қиладиган ҳар бир қарор тахминан бир йилга кечикмоқда, — деди Зеленский Украинага қурол ва ўқ-дорилар етказиб бериш билан боғлиқ вазиятни изоҳлар экан.
Унинг сўзларига кўра, айни дамда Киев Россияга ҳавода қарши туриш учун зудлик билан камида 120-130 та ҳарбий техникага муҳтож.
Ҳозир буни таъминлай олмайсизми, келинг, НАТО мамлакатларидаги самолётларга қайтайлик. Уларни учиринг, нишонларни ўққа тутинг, тинч аҳолини ҳимоя қилинг, — деди Зеленский.
Украина президенти иттифоқчи давлатларни Россияга қарши мудофаа ҳужумига кўпроқ жалб этиш истагида. Зеленскийга кўра, ҳамма эскалациясидан қўрқади. Украиналиклар ўлаётгани одатий ҳол — одамлар учун бу кескинлик эмас.
Зеленский шунингдек, Киев Россия ҳудудида рус ҳарбий техникасига зарба бериш учун Ғарб қуролларидан фойдаланиш бўйича музокаралар олиб бораётганини, аммо ҳозирча келишув йўқлигини айтган.
15-16 июнь кунлари Швейцарияда бўлиб ўтадиган глобал тинчлик саммити ҳақида гапирар экан, Зеленский тадбирга имкон қадар кўпроқ давлатни йиғиш зарурлигини таъкидлаган. У Россия фақат Украина олдида эмас, балки дунёнинг аксарият давлатлари олдида жавоб бериши кераклигини қўшимча қилган.
Украина раҳбари Хитойнинг саммитдаги иштироки муҳимлигини эслатган.
Саммитдан сўнг ким урушни тугатишни ва ким Россия билан мустаҳкам алоқаларни сақлаб қолишни исташи аниқ бўлади, — деди Зеленский.
Президент, шунингдек, сўнгги бир неча ой ичида ҳарбий муваффақиятсизликка учраганига қарамай, Украина урушда ғалаба қозониши мумкинлигини ҳам таъкидлаган. У одамлар “ғалаба” сўзини шубҳа билан қабул қилсалар ҳам, бу йўлдан охиригача бориш кераклигини айтган.
Изоҳ (0)