Germaniya va AQSH Isroil bosh vaziri Netanyaxuni HAMAS yetakchilari bilan tenglashtirmaslikka chaqirdi, deya Deutsche Welle xabar berdi.
Ma’lum bo‘lishicha, Germaniya TIV Xalqaro jinoiy sud (XJS) bosh prokurori Karim Xonning ikki isroillik amaldor va HAMAS yetakchilarini hibsga olishga order berish talabini tanqid qilgan.
Bir tomondan, Isroil yetakchilarini, ikkinchi tomondan HAMASning uch yetakchisini hibsga olish uchun order berish talabi ekvivalentlik haqida noto‘g‘ri taassurot uyg‘otdi, — deyiladi Germaniya TIV bayonotida.
Unda HAMAS 2023-yil 7-oktyabrda Isroilga uyushtirgan hujumida “vahshiyona qirg‘in” qilgani va Isroil hukumati o‘z xalqini bundan himoya qilishga haqli ekanligi ta’kidlangan.
AQSH rasmiylari Karim Xonning so‘rovini qattiq tanqid qilgan.
Bu prokuror nimani nazarda tutmasin, Isroil va HAMAS o‘rtasida hech qanday tenglik yo‘q. Biz Isroil xavfsizligi uchun doimo uning yonida bo‘lamiz, — dedi prezident Jo Bayden bayonotida.
Avvalroq AQSH Davlat departamenti rahbari Entoni Blinken prokurorning talabini “sharmandali” deb atagan. AQSH Kongressi a’zosi Mayk Jonson esa Isroil rasmiylarini hibsga olish orderi tasdiqlansa, XJSga qarshi sanksiyalar qo‘llash ehtimolini aytgan.
Netanyaxu va HAMAS yetakchilarini hibsga olish uchun order
Avvalroq XJS bosh prokurori Karim Xon Isroil bosh vaziri va mudofaa vaziri hamda HAMASning uch yetakchisi: Yahyo Sinvar, Muhammad Al-Masri va Ismoil Haniyani hibsga olish uchun order talab qilgan edi.
Prokuror bayonotida HAMAS yetakchilari urush va insoniyatga qarshi jinoyatlar — qotillik, garovga olish, jinsiy zo‘ravonlik harakatlari, qiynoqlar uchun javobgar ekanligi ta’kidlangan.
Netanyaxu va Galantga qo‘yilgan ayblovlar G‘azoda tinch aholini ochlikdan o‘ldirishdan urush usuli sifatida foydalanish, qasddan azob-uqubat yoki og‘ir tan jarohati yetkazish, shafqatsiz muomala, tinch aholiga qasddan hujumlarni o‘z ichiga oladi.
Izoh (0)