Isroil harbiy mahkamasi vaziri Benni Gants agar bosh vazir Binyamin Netanyaxu urush tugaganidan keyingi G‘azodagi harakatlar rejasini taklif qilmasa, iste’foga chiqishi bilan tahdid qildi. Bu haqda Times of Israel xabar berdi.
Gants Isroil bosh vaziridan rejani 8-iyungacha taqdim etishni talab qildi. Uning fikricha, reja oltita strategik maqsadni o‘z ichiga olishi kerak, jumladan, garovga olinganlarni ozod qilish, HAMASni ag‘darish, G‘azo sektorini demilitarizatsiya qilish va uni nazorat qilish, AQSH, Yevropa Ittifoqi, arab davlatlari va falastinliklar ishtirokida anklavning “fuqarolik boshqaruvining xalqaro mexanizmi”ni yaratish.
Agar fanatiklar yo‘lini tanlasangiz va xalqni tubsizlikka olib borsangiz, biz hukumatni tark etishga majbur bo‘lamiz. Bu holda biz xalqqa yuzlanamiz va xalq ishonchini qozonadigan hukumat tuzamiz, — dedi Gants.
Bunga javoban Netanyaxu Gants “HAMASga ultimatum qo‘yish o‘rniga, bosh vazirga ultimatum taqdim etishga” qaror qilganini aytdi. Uning so‘zlariga ko‘ra, Gantsning talablari Isroilning mag‘lubiyatini anglatadi.
“Benni Gants ilgari surgan shartlar quruq so‘zlar bo‘lib, ularning maʼnosi aniq: urushning tugashi va Isroilning mag‘lubiyati, garovga olinganlarning ko‘pchiligini ozod qilish, HAMASni daxlsiz saqlash va Falastin davlatini yaratish”, — dedi bosh vazir.
Gantsning bayonoti Isroil mudofaa vaziri Yoav Galant bosh vazirni Isroil G‘azoga o‘zining fuqarolik va harbiy boshqaruvini o‘rnatmasligiga ochiq va’da berishga chaqirganidan bir necha kun o‘tib yangradi. Gants va Galantning fikricha, anklavning harbiy nazorati Isroil uchun xavfsizlik xatarlari oshishiga olib keladi.
Izoh (0)