Xalqaro jinoiy sud prokurori Karim Xon Isroil bosh vaziri Binyamin Netanyaxuni insoniyatga qarshi jinoyatlari ortidan hibsga olish uchun order talab qildi. Bu haqda Xalqaro jinoiy sud rasmiy manbasiga tayanib, CNN nashri xabar berdi.
Manbada aytilishicha, Karim Xon Isroil rahbari G‘azodagi voqealar uchun javob berishi kerakligini maʼlum qilgan. Jinoiy sudni Netanyaxuni hibsga olish uchun order berishga chaqirgan.
Talabnomada Netanyaxu bilan birgalikda Isroil mudofaa vaziri Yoav Gallantni ham hibsga olish so‘ralgan. Isroil rahbariyatining ikki vakiliga gumanitar halokat sharoitida yashayotgan G‘azo aholisiga nisbatan harbiy jinoyatlar sodir etish va ko‘plab fuqarolar qurbon bo‘lishiga sababchi bo‘lish ayblovlari qo‘yilgan.
Prokuror Karim Xon, shuningdek, HAMAS rahbariyatining uch vakiliga nisbatan ham hibsga olish orderi berilishini talab qilgan. Ular orasida HAMAS boshqaruvining G‘azodagi rahbari Yahyo Sinvar, HAMAS harbiy qanoti bo‘lgan “Al-Qassam” brigadalari bosh qo‘mondoni Muhammad Diab Ibrohim Al-Masriy va tashkilot siyosiy byurosi rahbari Ismoil Haniya borligi qayd etilgan.
Hibsga olish orderi berilishi talab qilingan ushbu talabnoma ilk bor Isroil oliy rahbariyati vakillarini nishonga olgan. Agar ushbu talabnoma arizasi maʼqullansa, Isroil yetakchilariga nisbatan hibsga olish ehtiyot chorasi rasman qo‘llanishiga olib keladi.
Maʼlumot o‘rnida, Xalqaro jinoiy sud tomonidan hibsga olish orderi oldinroq Rossiya prezidenti Vladimir Putinga nisbatan eʼlon qilingan. Rossiya rahbarini suveren Ukrainaga bostirib kirish, tinch aholi o‘limiga sababchi bo‘lish hamda Ukrainaning Bucha shahrida ommaviy qirg‘inga yo‘l qo‘yishda ayblab, hibsga olish buyrug‘i chiqarilgan.
Manbaga ko‘ra, hibsga olinishi so‘ralgan HAMAS vakillari qirg‘in uyushtirish, qotillik, garovga olish va jinsiy zo‘ravonlikda ham ayblangan. Ushbu ayblovlar asosan 7-oktyabrdagi HAMAS hujumi oqibatlariga qaratilgan.
Sud prokurorning arizasini ko‘rib chiqishi maʼlum qilingan.
Izoh (0)