Isroil prezidenti Isaak Gertsog 20-may kuni Xalqaro jinoiy sud prokurori tomonidan bosh vazir Binyamin Netanyaxuni hibsga olish uchun order talab qilinishiga nisbatan o‘z munosabatini bildirdi. Bu haqda The Times of Israel nashri xabar berdi.
Prezident Isaak Gertsog jinoiy sud prokurori Karim Xonning Binyamin Netanyaxu va mudofaa vaziri Yoav Galantni hibsga olish uchun order berish haqidagi talabini “sharmandali” deb atagan. Ushbu kabi hodisalar xalqaro sud tizimi qulash arafasida ekanini ko‘rsatishini maʼlum qilgan.
“Razil niyat bilan amalga oshirilgan bu bir tomonlama harakat butun dunyo bo‘ylab terrorchilarni jasoratga undaydigan bir tomonlama siyosiy qadamdir. Ushbu talab bir-birini to‘ldirish tamoyili va boshqa huquqiy normalarga muvofiq sudning barcha asosiy qoidalarini buzadi”, — degan Isroil prezidenti.
Isaak Gertsog, shuningdek, HAMAS yetakchilari va Isroilning demokratik yo‘l bilan saylangan hukumati o‘rtasida o‘xshashlik yaratishga bo‘lgan har qanday urinishni nafratlanarli holat deb atagan. Isroil yelkasiga hech qanday ayb qo‘ymaslikka chaqirgan.
“Biz bu urushni kim boshlaganini, kim begunoh fuqarolar va oilalarni zo‘rlaganini, so‘yganini, yoqib yuborganini, shafqatsizlarcha o‘g‘irlagani va yashirganini unutmaymiz”, — deya so‘zi oxirida dunyoning barcha rahbarlarini jinoiy sudga kiritilgan talabnomani qoralashga chaqirgan Isroil prezidenti.
Izoh (0)