O‘zbekistonda 2024-yil 1-iyundan boshlab “mahalla yettiligi” vakillari tomonidan yagona savolnoma asosida fuqarolarning ijtimoiy-iqtisodiy muammolarini aniqlash va bartaraf etishi tizimi joriy etiladi. Bu haqda Vazirlar Mahkamasining “Mahallalarda aholi muammolarini aniqlash tizimini takomillashtirish to‘g‘risida”gi qarori loyihasida e’lon qilindi.
Unda aytilishicha, fuqarolarni birlamchi o‘rganish jarayonida faqat yagona savolnomadan foydalaniladi. Yagona savolnoma asosida aniqlangan birlamchi muammolarni “mahalla yettiligi” vakillari o‘zlarining idoraviy savolnomasidan foydalanib, atroflicha o‘rganish ishlarini tashkil qilinadi.
Ushbu savolnoma asosida fuqarolarning aniqlangan muammolari “mahalla yettiligi” vakillarining elektron platformalariga aholi bilan individual tartibda ishlash uchun buyurtma sifatida shakllantiriladi. Bunda, buyurtmani “mahalla yettiligi” vakillari tomonidan ko‘rib chiqilishi majburiy hisoblanadi.
Fuqarolarning yagona savolnoma asosida aniqlangan hamda “mahalla yettiligi” vakillariga hal etish uchun yo‘naltirilgan muammolarini ko‘rib chiqish va natijalari 10 kun ichida elektron axborot tizimiga kiritiladi.
Quyidagi holatlarda yagona savolnomadan foydalanib, fuqarolarning muammolarini o‘rganish va ularga ijtimoiy-iqtisodiy yordam (xizmat) ko‘rsatish ishlari tashkil qilinadi:
- fuqaroning murojaati asosida;
- uyma-uy yurish orqali;
- boshqa fuqarolar tomonidan shaxsning ijtimoiy-iqtisodiy yordam (xizmat)ga muhtojligi to‘g‘risida xabar berilganda;
Mahalla raisi yagona savolnoma asosida aniqlangan hamda mas’ul tashkilotlarga yo‘naltirilgan muammolarning o‘z vaqtida ko‘rib chiqilishi va ijobiy hal etilishi uchun mas’ul hisoblanadi.
Qayd etilishicha, bu tartibning yo‘lga qo‘yilishi fuqarolarning muammolarini aniqlashning yagona tizimi yaratilib, raqamlashtirilishiga, muammolar hal etilishida “mahalla yettiligi” vakillari va boshqa mas’ul vazirlik va idoralarning mas’uliyati oshirilishiga xizmat qiladi.
Izoh (0)