Namanganda elektrdan noqonuniy foydalanganlar to‘rt kunda 5 mlrd so‘mdan ziyod zarar yetkazdi, deb xabar bermoqda Elektr energiyasi, neft mahsulotlari va gazdan foydalanishni nazorat qilish inspeksiyasi.
Unga ko‘ra, 14—17-fevral kunlari Energetika vazirligi huzuridagi “O‘zenergoinspeksiya” tomonidan Bosh prokuratura va huquqni muhofaza qiluvchi boshqa organlar, shuningdek, elektr hamda gaz ta’minoti korxonalari xodimlari bilan hamkorlikda Namangan viloyatida o‘tkazilgan nazorat tadbirlarida energiya resurslaridan noqonuniy foydalanilgan 61 ta holat aniqlandi.
Ular tomonidan tizimga 5 milliard 70 million so‘mlik zarar yetkazilgan. Misol uchun, Chortoq tumanida joylashgan “Ch.M.V.” MCHJda 1 milliard 683 million so‘mlik hisobga olinmagan elektr energiyasi aniqlandi. To‘raqo‘rg‘on tumanida esa “S.S.M.” MCHJ o‘zboshimchalik bilan elektr tarmog‘iga noqonuniy ulanib, davlat manfaatlariga 319,9 million so‘mlik zarar keltirgan.
Qoidabuzar iste’molchilarga nisbatan belgilangan tartibda chora ko‘rish uchun tegishli hujjatlar rasmiylashtirilib, huquqni muhofaza etuvchi organlarga taqdim qilindi.
Izoh (0)