Janubiy Afrikaning Isroilga qarshi BMT sudiga bergan da’vosiga Turkiya ham qo‘shildi

Anqara Xalqaro sudga Janubiy Afrikaning Isroilga qarshi da’vosiga qo‘shilish so‘rovini topshirdi.

Bu haqda Turkiya tashqi ishlar vaziri Xoqon Fidan Anqarada tashrif bilan bo‘lib turgan Avstriya tashqi ishlar vaziri Aleksandr Shallenberg bilan bo‘lib o‘tgan matbuot anjumanida ma’lum qildi, deb yozadi “TASS”.

“Isroilning kelgusida bunday ta’qiblarga yo‘l qo‘ymasligi uchun qanday diplomatik choralar ko‘rish kerakligini aniqlash uchun xalqaro huquq doirasida ish boshladik. Islom hamkorlik tashkilotiga a’zo davlatlar o‘z tayyorligini bildirgach, keyingi qadamlarni qo‘ymaganini ko‘rdik. Biz Janubiy Afrika tashabbusi bilan o‘tkazilgan xalqaro sud jarayonini diqqat bilan kuzatib bordik. Qulay vaqt yuzaga kelishi bilan biz ham JARning da’vosiga qo‘shildik. Bizdan keyin boshqa davlatlar ham shunday qilishini kutib qolamiz”, — dedi Xoqon Fidan.

Fidanning so‘zlariga ko‘ra, Turkiya ortidan Liviya va Misr ham Xalqaro suddagi jarayonlarda ishtirok etish niyatlarini e’lon qilgan.

“Xalqaro hamjamiyat Netanyaxu hukumatiga bosimni kuchaytirishi kerak. Netanyaxu butun dunyo xavfsizligi uchun muammoga aylandi”, — deya qo‘shimcha qildi Turkiya tashqi ishlar vaziri.